Tamyz konferentsııasy Qaraǵandy oblysy pedagogtarynyń basyn qosty
QARAǴANDY. QazAqparat - Qaraǵandy oblysynda bıylǵy jyly bilim berý qyzmetkerleriniń dástúrli tamyz keńesi jańa formatta uıymdastyryldy. Konferentsııa úshin TEDx zııatkerlik stılin tańdap, qyzyqty jáne ozyq ıdeıalary bar spıkerlerdi jınady, dep habarlaıdy QazAqparat óńir basshysynyń resmı saıtyna silteme jasap.
Moderator retinde aımaq basshysy Erlan Qoshanov sóz sóıledi.
S. Sápıev atyndaǵy oblystyq boks ortalyǵynyń úlken zalynda ótkizilgen jıyn onlaın-rejimde ótti. Oǵan oblystyń barlyq qalalary men aýdandarynan 10 myńnan astam adam keldi. Sharaǵa QR Bilim jáne ǵylym vıtse-mınıstri Rústem Bıǵarı, «Nazarbaev Zııatkerlik mektepteri» DBBU Basqarma tóraǵasy Kúlásh Shamshıdınova qatysty.
Kórmede jańa bilim berý tehnologııalary men oqý jabdyqtary, sondaı-aq mektep oqýshylary men kolledj stýdentteriniń ekologııalyq jobalary usynyldy.
- Tamyz konferentsııasy – eń bedeldi pedagogıkalyq alań. Bul jerde bilim berýdiń barlyq ózekti máseleleri talqylanady jáne eń bastysy olardy sheshýdiń naqty joldary qabyldanady. Bıylǵy jyly biz konferentsııany dástúrli túrde ótkizýden bas tarttyq. Ol alǵash ret kópshilik aldynda sóz sóıleýdiń jańa janrynda ótedi, - dedi Erlan Qoshanov. - Biz qazir jańa tehnologııalyq revolıýtsııanyń kýágeri boldyq. Bul tek tehnık mamandaryna ǵana emes, árqaısymyzǵa qatysty. Memleket basshysy aıtqandaı, «Bilim berý júıesi jańa úrdisterge tez beıimdelýdi qajet etedi». Sondyqtan da biz jańa oqý jylynda óz jumystaryńyzda qoldanýǵa bolatyn jańa tásilder, qyzyqty jobalar, kreatıvti ıdeıalardy talqylaýǵa jınaldyq.
Spıkerler bilim berýdiń barlyq baǵyttary: mektepke deıingi, orta jáne kásibı bilim boıynsha baıandamalar jasady. Óz tájirıbesimen tek pedagogtar ǵana emes, kásipkerler, qurylysshylar men sportshylar da bólisti.
Mysaly, Shahtınsk qalasynda bilim berýdiń fın úlgisi engizildi, bul tájirıbe tıimdi boldy. Shahtınsk mektepterinde ishki aýdıt júıesi engizildi. Oqýshylar jumys protsesin ózderi baqylap, taım-menedjmentke úırenýi úshin qońyraýdan bas tartty.
«Mektep-ınternat-kolledji» jobasy pılottyq rejimde úsh aýyldyq aýdanda iske qosylady. Onyń maqsaty – aýyl jastarynyń bolashaq mamandyǵyn anyqtaýǵa kómektesý.
«Kishkentaı kemeńgerler» atty oqý quraly tanystyryldy. Qatysýshylar STIM-bilim berýdi engizý joldaryn talqylady.
Konferentsııa barysynda muǵalimderdi aldaǵy ýaqytta ózgerister bolatyny týraly jańalyq qýatty. Jaqynda kópten kútken «Pedagogtardyń mártebesi týraly» zań jobasy Parlament depýtattarynyń qaraýyna berildi. Memleket basshysy pedagogtardyń jalaqysyn eki esege arttyrý mindetin qoıdy, dep atap ótti Erlan Qoshanov.
Konferentsııa barysynda bilim berý salasynyń ardagerleri men úzdik qyzmetkerler marapattaldy. Sondaı-aq oblys ákiminiń Qurmet gramotalary men alǵys hattary berildi. Birneshe adam «Bilim berýdiń qurmetti qyzmetkeri» ataǵyna ıe boldy.
