Tamyz konferentsııasy: ınklıýzıvti bilim berýdiń ózekti máseleleri bar

NUR-SULTAN. QazAqparat – Tamyz konferentsııasynyń ekinshi kúni Y. Altynsarın atyndaǵy UBA alańynda 28 myńnan astam muǵalim onlaın formatta bas qosty. Pedagogter ınklıýzıvti bilim berýdiń ózekti máselelerin talqylady, dep habarlaıdy QazAqparat Oqý-aǵartý mınıstrliginiń baspasóz qyzmetine silteme jasap.

«Memleket basshysy Qasym-Jomart Toqaev Qazaqstan halqyna Joldaýynda bilim berý júıesi qoljetimdi jáne ınklıýzıvti bolýy keregin atap ótken bolatyn. Bıyl Y. Altynsarın atyndaǵy akademııa psıhologııalyq-pedagogıkalyq túzetý kabınetteriniń bilim berý uıymdaryn psıhologııalyq-pedagogıkalyq qoldaý kórsetý mamandarymen ózara is-qımyl jasaý boıynsha ádistemelik usynystar ázirledi. Aldaǵy ýaqytta osy baǵyt boıynsha jumys jalǵasyn tabady», - dedi Y. Altynsarın atyndaǵy UBA prezıdenti Madına Tynybaeva.

Basqosý barysynda ınklıýzıvti bilim berýdi normatıvtik-quqyqtyq qamtamasyz etý, muǵalimderdi ádistemelik qoldaý boıynsha jumysty uıymdastyrý, aımaqtyq deńgeıde ınklıýzıvti bilim berý jumysyn úılestirý, ınklıýzıvti tájirıbeni damytý jaǵdaıynda barlyq oqýshy úshin qolaıly bilim berý ortasyn qurý jáne basqa da máseleler kóterildi.

Eske salsaq, Qazaqstanda pedagogterdiń respýblıkalyq tamyz konferentsııasy bastaldy. Forým 19 tamyzǵa deıin jalǵasady jáne dál osy kúni qorytyndy plenarlyq otyrys ótedi.