Tamyz konferentsııasy: Aqmola oblysynda bilim berý júıesiniń jetistikteri talqylandy
Kókshetaýda uıymdastyrylǵan plenarlyq sessııaǵa QR Bilim mınıstri Ashat Aımaǵambetov pen aımaq basshysy Ermek Marjyqpaev qatysty, dep habarlaıdy QazAqparat tilshisi oblystyq ishki saıasat basqarmasyna silteme jasap.
Sharada aımaq basshysy tamyz konferentsııasy óńirlik bilim berý júıesiniń damý úrdisteri men jetistikterin jandandyrýǵa baǵyttalǵanyn atap ótti. Budan ári Ermek Marjyqpaev óńirdegi bilim berý nysandarynyń ınfraqurylymdyq damýyndaǵy basym baǵyttarǵa egjeı-tegjeıli toqtaldy.
«Biz 32 bilim berý nysanynyń, onyń ishinde 12 mekteptiń qurylysy men qaıta jańartylýyn jalǵastyrýdamyz, onyń ishinde 5 oqý orny men qosymsha korpýsty bıyl paıdalanýǵa berý josparlanyp otyr. Mektepterge kúrdeli jóndeý júrgizýdiń óńirlik jol kartasy iske qosyldy», - dep atap ótti aımaq basshysy.
Sonymen birge, konferentsııada Anastasııa Kravchenkonyń memlekettik tilde sóılegen sózi erekshe qyzyǵýshylyq týdyrdy.
«Tamyz konferentsııasynda sóılegen sózimde pedagogtyń uly jolyn tańdap, balalardyń bilimi men tárbıesine óz úlesimdi qosatynymdy jáne bul úshin qurmetti mamandyqtyń jas ókili retinde memleketimiz usynatyn barlyq múmkindikterdi paıdalanatynymdy aıttym», - dedi Kókshetaý qalasyndaǵy balabaqsha tárbıeshisi.
Shara sońynda oblystyń pedagogıkalyq qoǵamdastyǵynyń 29 úzdik ókilderi «Ybyraı Altynsarın», «Qazaqstan Respýblıkasynyń bilim berý isiniń qurmetti qyzmetkeri» tósbelgilerimen, sondaı-aq Aqmola oblysy ákiminiń Alǵys hatymen jáne aqshalaı sertıfıkattarmen marapattaldy.
Marapattalǵandardyń arasynda Jaqsy aýdanynyń №1 mektebiniń muǵalimi Lázzat Qasqaeva da bar.
«Meniń pedagog retindegi maqsatym-oqýshylarymdy jańasha oqytý jáne biz jahandaný dáýirindegi jańa trendterge baılanysty ózimiz bilim alýǵa umtylamyz», - dep bólisti pedagog.
Aıta keteıik, óńirge bes jyl ishinde 38 mektep salý jáne 470 mektepti jańǵyrtý mindeti qoıylǵan. Aǵymdaǵy jyldyń ózinde 10 jańa mektep paıdalanýǵa berilip, 94-i jańǵyrtylatyn bolady.