Tamyz keńesi - bul tamyry tereń, taǵlymy mol, aıtary aıqyn, maqsaty tyń taqyryptardy talqyǵa salatyn - jaýapty jıyn - elorda ákimi
STANA. Tamyzdyń 25-i. QazAqparat /Marlan Jıembaı/ - Tamyz keńesi - bul tamyry tereń, taǵlymy mol, aıtary aıqyn, maqsaty tyń taqyryptardy talqyǵa salatyn - jaýapty jıyn. Bul pikirdi búgin elordanyń pedagog qyzmetkerleriniń tamyz keńesine qatysqan Astana qalasynyń ákimi Imanǵalı Tasmaǵambetov bildirdi.
Sóz oraıynda qala basshysy burynǵylardan qalǵan «Adamzat balasynyń bul ómirde úsh túrli mindeti bolady» degen sózine toqtaldy. Onyń birinshisi - urpaq órbitip, tárbıe berý, ekinshisi - ustazdyq qylyp, shákirt baptaý, úshinshisi - ilim-bilim jınap, qoǵamǵa qyzmet etý. «Bul oraıda, tálim-tárbıe - ata-anadan, oqý men bilim - ustazdan, al qoǵamǵa qyzmet etý - barshamyzǵa ortaq paryz bolsa kerek. Urpaqtyń juldyzyn jaǵyp, mártebesin bıiktetetin de, taǵlymyn qalyptastyryp, tanymyn keńeıtetin de osy qaǵıdalar. Іlim men ǵylym - bul qoǵamdyq múdde. Órkenıettiń ólshemi de, memlekettiń keleshegi de qashanda qoǵamdaǵy bilim deńgeıine táýeldi. Bul oraıda, Ahmet Baıtursynulynyń «Mekteptiń jany - muǵalim. Muǵalim qandaı bolsa, mektep sondaı bolmaq» degen sózi eske túsedi. Osy bir ataly uǵym biz úshin árqashanda basty ustanym bolýy shart», dedi qala basshysy.
Onyń atap ótýinshe, qazirgi tańda memleket bilim salasyna qoldaý kórsetý úshin qoldan kelgen múmkindiktiń barlyǵyn da jasap keledi. Bul solaı bolýy da tıis. Sebebi urpaq bilimi úshin jumsalar qarjy men qaırat - eń qaıtarymy mol, qaıyrymy keń ıgi shara ekeni belgili.
«Sóz joq, eger muǵalim óz boıyndaǵy jaqsy qasıetter men shákirtterine degen súıispenshilikti biriktire alsa, ol - kemel ustaz. Biz osy bir qarapaıym qaǵıdany qaı kezde de jadymyzdan shyǵarmaýymyz qajet», dep qorytty oıyn I.Tasmaǵambetov.
