«Tamyz ınvest grýpp» AQ basshylyǵy úleskerlerge jaǵymdy jańalyq habarlady: barlyq nysandardyń qurylysy jyl sońyna deıin aıaqtalady
ASTANA. 15 sáýir. QazAqparat /Jasulan Amanbaıuly/ - «Tamyz ınvest grýpp» qurylys kompanııasy Astanadaǵy úleskerlik qurylys nysandaryn jyl sońyna deıin paıdalanýǵa beretin boldy. Bul týraly búgin Astanada ótken baspasóz máslıhatynda atalǵan aktsıonerlik qoǵamnyń tóraǵasy Álııa Mataeva málim etti.
Onyń aıtýynsha, elordadaǵy turǵyn úılerdiń salynyp bitýine qajetti qarjy tabyldy. Endi tek jyl sońyn kútip, úleskerlerge ózderine tıesili jańa baspanalardyń kiltterin tabystaý ǵana qaldy.
«Bizdiń ınvestor - sheteldik «Eýrazııa koneshenel» kompanııasy. Qurylys nysandaryn aıaqtaýǵa bizge 3,585 mlrd. teńge qarajat qajet. Alǵashqy 1 mlrd. shotymyzǵa tústi, qazir ol ıgerilip jatyr. Ekinshi soma 25 sáýir kúni bizdiń esepter tabys etilgennen keıin beriledi. Degenmen bul qarajat keste boıynsha mamyrdyń sońynda biraq qolymyzǵa tıedi. Bizdiń ınvestorlardan túsken qarjynyń barlyǵy nysandardy salyp bitirýge jumsalady. Qurylysty aıaqtaýǵa bizdiń kompanııanyń ózi kirisip jatyr»,-dedi Á. Mataeva.
«Biz Astananyń qurylysshy kompanııasy bolyp tabylamyz, Úkimet jáne úleskerler aldynda naqty mindetterimiz bar. Moınymyzǵa alǵan barlyq mindetti nysandar qarjylandyrý kestesine jáne jumys óndirisine sáıkes oryndalady»,-dep atap kórsetti kompanııa tóraǵasy.
Á. Mataeva Astanadaǵy ózderine tıesili ár nysannyń tapsyrylatyn merzimderin jeke-jeke oqyp shyǵyp, tilshilerge onyń barlyǵy dál merziminde - jyl sońyna deıin paıdalanýǵa beriletindigin qadap aıtty.
«Jeke nysandar boıynsha, Astanada olardyń sany jeteý: «Magıstralnyı», «Orbıta», «San sıtı», «Altyn raıd», «Ómir», «Komfort-1» jáne «Komfort-2» turǵyn úı keshenderi boıynsha naqty jumys grafıkteri bar. Olardyń qurylysyna bizdiń qurylysshylar men merdigerler tartylǵan. Búgingi tańda jumystar ýaqytqa saı jáne grafık boıynsha kele jatyr. Barlyq nysandarymyz bıyl aıaqtalady: olardyń keıbiri: «Magıstralnyı», «Altyn raıd», «Ómir» jáne «San sıtı» keshenderi shilde aıynda tapsyrylmaq»,-dep habarlady Á.Mataeva.
Alaıda kompanııada bir qurylys nysanyna qatysty sheshilmegen suraq týyndap otyr. Á. Mataevanyń sózinshe, kompanııa bul máseleni jaqyn arada sheshýge múddelilik tanytýda.
«Komfortnyı-2» turǵyn úı keshenin qyrkúıek aıynda paılanýǵa bermekpiz. «Orbıta» keshenin qarasha aıynda aıaqtamaqpyz. Biraq bizde áli kúnge deıin «Komfortnyı-1» qurylys nysanyna qatysty bir bitpegen másele bar. Degenmen bul másele sheshimin taýyp bıyl qarasha-jeltoqsan aıynda tapsyrylatynyna senimdimin»,-dedi Á. Mataeva.
Baspasóz máslıhatynda habarlaǵandaı , «Tamyz ınvest grýpp» AQ úleskerleri baspanalardyń kiltterin 3-4 jyl ala almaı, Qarjy polıtsııasy organyna birneshe ret aryzdanǵan. Alaıda tekseris kezinde Qarjy polıtsııasynyń qyzmetkerleri qurylys kompanııasy tarapynan eshqandaı zańbuzýshylyq tappaǵan. 2011 jyly «Tamyz ınvest grýpp» AQ-nyń basshylyǵy aýysty. Jańa jetekshilerdiń bilikti is-qımyldary arqasynda syrttan ınvestorlyq qarajattar tartylyp, Astanadaǵy turǵyn úı keshenderin jyl sońyna deıin salyp bitirýge múmkindik ashty.
