Tamyz aıynda betperde shyǵaratyn túrkııalyq zaýyt qurylysy aıaqtalady

NUR-SULTAN. QazAqparat - Indýstrııa jáne ınfraqurylymdyq damý mınıstri Qaıyrbek Óskenbaev MFA International men ATM Construction & Investment JShS-teri zaýyttarynyń qurylysymen tanysty, dep habarlaıdy QazAqparat.

Vedomstvo basshysy birinshi aıaldaǵan MFA International JShS zaýyty medıtsınalyq betperdeler men aýa tazartatyn respıratorlar óndiredi. «Astana – jańa qala» AEA ındýstrııalyq parki aýmaǵynda ornalasqan túrkııalyq kásiporynnyń qurylysy bıyl tamyz aıynda tolyǵymen aıaqtalmaq.

«Jobanyń alǵashqy kezeńinde Z-267 serııaly qorǵanysh deńgeıi joǵary betperde shyǵarý kózdelse (jylyna 2,5 mln dana betperde), kásiporyn tolyq iske qosylǵanda Prestij (P-267V) serııaly medıtsınalyq maska óndirý josparlanǵan (jylyna 10 mln dana betperde). Jobanyń jalpy quny – 2,1 mlrd teńge», - dep jazdy mınıstrlikten.

Al tereze, medıtsınalyq qural-jabdyqtar, keńse jıhazdary men metall buıymdaryn óndiretin «ATM Construction & Investment» JShS zaýyty 2022 jyldyń qyrkúıek aıynda iske qosylmaq. Kásiporyn «Astana – jańa qala» arnaıy ekonomıkalyq aımaǵynda ornalasqan. Jalpy quny 22 mlrd teńgeni quraıtyn zaýyt tolyq iske qosylǵanda 500 jańa jumys orny paıda bolady dep kútilýde. Joba jalpy aýmaǵy 17 myń sharshy metr aýmaqtaǵy bes negizgi óndiristik keshennen turady.