Tamyz aıynda azyq-túlik taýarlarynyń baǵasy 5,8 paıyzǵa ósti - Statıstıka agenttigi
ASTANA. Qyrkúıektiń 2-si. QazAqparat /Janna Qorqytova/ - Aǵymdaǵy jyldyń tamyz aıynda azyq-túlik taýarlarynyń baǵasy, ótken jyldyń tamyz aıymen salystyrǵanda, 5,8 paıyzǵa ósti, dep habarlady ótken aıdyń qorytyndysyn shyǵarǵan Statıstıka agenttigi.
«Ótken jyldyń sáıkes aıymen salystyrǵanda, qanttyń baǵasy 23,3 paıyzǵa, kofe, shaı jáne kakaonyń baǵasy- 13 paıyzǵa, kondıter ónimderi - 8,5 paıyzǵa, maı jáne toń maı baǵasy - 8,3 paıyzǵa, sút ónimderi - 7,2 paıyzǵa qymbattady», delingen agenttiktiń aqparynda.
Sondaı-aq alkogoldik ishimdikterdiń baǵasy- 5,3 paıyzǵa, toqash ónimderiniń baǵasy - 4,5 paıyzǵa, jemis-kókónister - 1,1 paıyzǵa kóterilgen.
Esesine, unnyń baǵasy 17,5 paıyzǵa, jarma baǵasy -3,5 paıyzǵa, nannyń baǵasy- 1,8 paıyzǵa, makaron ónimderiniń baǵasy- 1,6 paıyzǵa tómendegen.
Atalǵan merzimde et jáne et ónimderiniń baǵasy 10,3 paıyzǵa ósken. Onyń ishinde, dońyz etiniń baǵasy - 9 paıyzǵa, shujyq ónimderi - 7,9 paıyzǵa, qoıdyń eti - 7,5 paıyzǵa, qus eti - 5,2 paıyzǵa, jylqy eti - 3,8 paıyzǵa kóterilgen.
