Tamyzdan bastap Astana – Ankara baǵytyndaǵy ushaq kún saıyn qatynaıdy
ASTANA. KAZINFORM – Qazaqstan men Túrkııa arasyndaǵy áýe qatynasy keńeıip, tamyz aıynan bastap Astana men Ankara, sondaı-aq Almaty men Ankara baǵyttaryndaǵy reıster sany edáýir artady, dep habarlaıdy Kólik mınıstrligi.
Mınıstrliktiń málimetinshe, halyqaralyq áýe baǵyttarynyń geografııasyn keńeıtý jáne qoldanystaǵy baǵyttar boıynsha reıster sanyn kóbeıtý jumystary jalǵasyp jatyr.
– Osy jyldyń tamyz aıynan bastap AJET áýe kompanııasy Astana – Ankara jáne Almaty – Ankara baǵyttary boıynsha reıster sanyn aptasyna ekiden jetige deıin ulǵaıtady, – dep habarlady vedomstvodan.
Osylaısha, eki baǵyt boıynsha da ushaqtar kún saıyn qatynaıtyn bolady.
Mınıstrlik jańa ózgeristerdiń Qazaqstan men Túrkııa arasyndaǵy iskerlik, saýda-ekonomıkalyq jáne týrıstik baılanystardy odan ári damytýǵa yqpal etetinin atap ótti.
Aıta keteıik, Gonkongtyń ulttyq áýe kompanııasy Qazaqstanǵa júk jáne jolaýshylar reısterin ashady.
