Tamyzdaǵy ınflıatsııanyń baıaýlaýyna ne sebep
ASTANA.KAZINFORM - 2026 jylǵy tamyzdyń qorytyndysy boıynsha jyldyq ınflıatsııa 9,8%-ǵa deıin tómendedi, al aılyq baǵa ósimi 0,6%-dy qurady, bul ótken jyldyń tamyzymen salystyrǵanda 0,4 paıyzdyq tarmaqqa tómen (2025 jylǵy tamyzda - 1%), dep habarlaıdy Úkimettiń resmı saıty.
Inflıatsııanyń baıalaýyna Memleket basshysynyń tapsyrmasy boıynsha Úkimettiń Ulttyq bankpen jáne Qarjy naryǵyn retteý jáne damytý agenttigimen birlesip iske asyryp jatqan baǵanyń ósýin tejeýge, makroekonomıkalyq turaqtylyqty qamtamasyz etýge jáne halyqtyń ál-aýqatyn arttyrýǵa baǵyttalǵan keshendi sharalary yqpal etip jatyr.
Inflıatsııanyń baıaýlaýyna negizgi úlesti azyq-túlik taýarlary baǵasynyń ósý qarqynynyń tómendeýi qamtamasyz etýdi jalǵastyrý ústinde. Tamyz aıynyń qorytyndysy boıynsha jyldyq azyq-túlik ınflıatsııasy 9,5%-ǵa deıin baıaýlady (2026 jylǵy shildede - 10,1%), al áleýmettik mańyzy bar azyq-túlik taýarlarynyń baǵa ósimi tek 2,1%-dy qurady (2026 jylǵy 26 tamyzdaǵy jaǵdaı boıynsha), bul bir jyl burynǵy kórsetkishten (9,5%) 7,4 paıyzdyq tarmaqqa tómen.
-Mundaı nátıje áleýmettik mańyzy bar azyq-túlik taýarlarynyń tizbesin 19-dan 31 túrge deıin keńeıtýdi, olarǵa shekti 15% saýda ústemesiniń saqtalýyna turaqty baqylaý júrgizýdi, ónimdi emes taýar deldaldaryn anyqtaýdy jáne azaıtýdy, ishki naryqty otandyq ónimmen qamtamasyz etýdi ári azyq-túlik taýarlarynyń qoljetimdiligin arttyrýdy qamtıtyn sharalar kesheni arqyly qamtamasyz etildi,-delingen habarlamada.
Bul rette janar-jaǵarmaı naryǵyn kezeń-kezeńimen lıberalızatsııalaý jáne retteletin kommýnaldyq qyzmetter tarıfterin kóterýge moratorııdiń aıaqtalýy sııaqty faktorlarǵa qaramastan, jalpy ınflıatsııanyń baıaýlaýy jalǵasý ústinde.
Osyǵan deıin elde ınflıatsııa qarqyny báseńdegeni týraly statıstıkalyq málimetterdi jarııalaǵan edik.
