Tamyzda TMD volonterleriniń alǵashqy forýmy ótedi
ASTANA. KAZINFORM – Bıyl tamyz aıynda Táýelsiz memleketter dostastyǵyna múshe elder volonterleriniń alǵashqy forýmy ótedi. Bul týraly Mádenıet jáne aqparat mınıstrliginen málim etti.
– Qazaqstan Prezıdenti Qasym-Jomart Toqaevtyń usynysymen 2026 jylǵy tamyzda Astanada TMD memleketteriniń alǵashqy forýmyn ótkizý josparlanýda. Forým aıasynda 9 memleketten (Armenııa, Ázerbaıjan, Belarýs, Qazaqstan, Qyrǵyzstan, Reseı, Tájikstan, Túrkmenstan men Ózbekstan) shaqyrylatyn 400-den astam volonterdiń qatysýymen túrli formattaǵy is-sharalar ótetin bolady, - dedi mınıstrlikten agenttiktiń resmı saýalyna oraı.
Forým aıasynda volonterliktiń jańashyl tendentsııalary men zamanaýı quraldaryn talqylaıtyn sarapshylardyń paneldik jáne taqyryptyq sessııalary ótedi.
Qazaqstannyń volonterlik tájirıbesi men halyqaralyq qatysýshylardyń keısterin tanystyratyn alańdar, volonterlik qaýymdastyqqa arnalǵan dıskýssııalar men sheber saǵattary uıymdastyrylady.
– Qazirgi ýaqytta atalǵan forýmnyń tujyrymdamasy ázirlenip, baǵdarlamasyn bekitý jumystary pysyqtalýda, - dedi vedomstvodan.
Aıta keteıik, jyl basynda ótken Volenterler forýmynda Prezıdent Qasym-Jomart Toqaev Úkimetke eriktiler isin damytý boıynsha 2030 jylǵa deıingi kezeńdi qamtıtyn jańa mazmundy qujat ázirleýdi tapsyrǵan edi.