Tamyz, qyrkúıek aılarynda 54 eldi mekende aýyl sharýashylyǵy sanaǵy ótedi
ASTANA. KAZINFORM – 2025 jyly ótetin aýyl sharýashylyǵy sanaǵyna daıyndyqty pysyqtaý úshin 20 tamyz ben 30 qyrkúıek aralyǵynda 54 eldi mekende pılottyq sanaq júredi.
Bul týraly Ulttyq statıstıka bıýrosy uıymdastyrǵan onlaın sessııada aıtyldy. Bıylǵy pılottyq sanaq ótetin 54 eldi mekenniń ishinde aýyldy eldi mekender de, qalalar da qamtylǵan.
«Pılottyq aýyl sharýashylyǵy sanaǵy – 2025 jylǵy negizgi aýyl sharýashylyǵy sanaǵyna daıyndyqtyń mańyzdy kezeńi. Ol tańdalǵan ádistemeniń durystyǵyn jáne aqparattyq júıelerdiń daıyndyǵyn tekserýge múmkindik beredi», - deıdi Ulttyq statıstıka bıýrosy basshysynyń orynbasary Ásel Shaýenova.
Іs-sharaǵa statıstıka mamandarynan bólek Aýyl sharýashylyǵy mınıstrliginiń, oblys ákimdikteriniń, salalyq qaýymdastyqtar men ǵylymı-zertteý ınstıtýttarynyń ókilderi qatysyp, aldaǵy sanaqtyń ádisnamasy týraly suraqtaryna jaýap aldy.
Aıta ketý kerek, aýyl sharýashylyǵyndaǵy resmı statıstıkany nólden bastaý kerektigi týraly paıymdar talaıdan beri aıtylyp keledi. Keıingi 1-2 jyldyń kóleminde mundaı bastamany salalyq mınıstrlik te qoldaıtynyn bildirip keledi. Bul sanaq halyqtyń qolyndaǵy, sharýashylyq nysandardaǵy maldyń basyn ǵana emes, dıqandardyń ıeligindegi jer telimderiniń kólemin, sharýashylyqta qoldanylatyn tehnıka men jabdyqtardyń, qondyrǵylar men quraldardyń, qoımalar sanyn, ondaǵy astyqtyń kólemin, tuqymnyń qoryn naqtylaýǵa baǵyttalmaq.
