Tamyz keńesi: Pavlodarda 10 shaǵyn jınaqty mektepke JI júıesi engiziledi
PAVLODAR. KAZINFORM - Pavlodarda óńir pedagogteriniń «Jańa halyqtyq Konstıtýtsııanyń normalary men qundylyqtary: adamı kapıtaldy damytý – bilim berý júıesiniń strategııalyq negizi» atty dástúrli tamyz keńesi ótti.
Іs-sharaǵa oblys basshysy Asaıyn Baıhanov, QR Oqý-aǵartý mınıstri Juldyz Súleımenova, QR Ǵylym jáne joǵary bilim vıtse-mınıstri Gúlzat Kóbenova, sondaı-aq jergilikti bilim berý salasynyń ókilderi qatysty.
Plenarlyq otyrys aldynda qonaqtar zamanaýı tsıfrlyq, tehnıkalyq jáne pedagogıkalyq sheshimder kórmesin tamashalap, ótken oqý jylynyń qorytyndylaryna arnalǵan beınefılmdi tamashalady.
Oqý-aǵartý mınıstri Memleket basshysy Qasym-Jomart Toqaevtyń naqty qoldaýlarymen jáne irgeli reformalarynyń nátıjesinde bilim salasynda sheshimin tapqan júıeli ári keshendi nátıjeler bar ekenin atap ótti. Kúshine engen Jańa Konstıtýtsııa Qazaqstannyń damýynyń jańa baǵdarlaryn aıqyndady. Onyń negizinde zań ústemdigi, eńbekke qurmet jáne árbir azamat úshin teń múmkindikter qaǵıdattary jatyr.
- Jańa oqý jylynan bastap bilim berý mazmuny birqatar jańa mindetti oqý kýrstarymen tolyqtyrylady. 5-7-synyp oqýshylary úshin «Konstıtýtsııa negizderi» páni, 8-11-synyptarda «Zań men tártip» mindetti oqý kýrsy engiziledi. Sonymen birge 5-11-synyp oqýshylary úshin «Jeke qaýipsizdik» mindetti oqý kýrsy engiziledi. Buǵan deıin tańdaý páni retinde oqytylyp kelgen «Quqyq negizderi» kýrsy barlyq oqýshylar úshin mindetti pánge aınaldy jáne mazmuny Jańa Konstıtýtsııa qaǵıdattaryna sáıkestendirildi, - dedi Juldyz Súleımenova.
Mektepterde úlgilik oqý josparlarynyń qurylymy ońtaılandyryldy. Oqýshylardyń barlyq oqý pánderine tolyq qoljetimdiligin qamtamasyz etý maqsatynda qysqartylǵan úlgilik oqý josparlary alynyp tastaldy. Bastaýysh synyptarda baǵalaý tásilderi jańartyldy. Atap aıtqanda, bólim boıynsha jıyntyq baǵalaý (BJB) jáne toqsan boıynsha jıyntyq baǵalaý (TJB) alynyp tastaldy. Kúndelikti baǵalaýdyń róli kúsheıtildi. Dıktanttar, mazmundama, shyǵarma, jobalar, aýyzsha jáne praktıkalyq jumystar sekildi baǵalaý ádisterin muǵalim ózi tańdap, aralyq baqylaý formasy retinde júzege asyratyn bolady.
Mınıstr Pavlodar oblysy bilim berý kórsetkishteri boıynsha respýblıkada únemi aldyńǵy qatardan kórinetinin, tek bıyldyń ózinde jergilikti oqýshylar túrli bilim olımpıadalarynan 311 medal (onyń 66-sy halyqaralyq olımpıalarda) jeńip alǵanyn jetkizdi. Ótken oqý jylynda Jaratylystaný-matematıka baǵytynda Ertis boıynyń oqýshylary «Úzdik olımpıadalyq komanda» atandy. PISA halyqaralyq zertteý nátıjelerine úńilsek, 2018 jyldan beri Ertis-Baıan óńirindegi aýyldyq mektepterdiń oqýshylary oqý saýattylyǵy, matematıkalyq saýattylyq jáne jaratylystaný saýattylyǵy boıynsha joǵary jetistikter kórsetip keledi.
- Jasandy zerdeni bilim salasyna engizý boıynsha elimizde aýqymdy ister atqarylyp jatyr. Bıyl shaǵyn jınaqty 500 mektepke engizilse, sonyń 10-y Pavlodar óńirinde ornalasqan. Oblysta erekshe qajettiligi bar balalardy bilimmen qamtý salasynda oń jetistikter bar. 10 myń «erekshe» balanyń 9 myńy arnaıy bilimmen qamtamasyz etilgen, - dep qosty mınıstr.
Asaıyn Baıhanov bilim berý ınfraqurylymyn damytýǵa baǵyttalǵan aýqymdy ınvestıtsııalar jaıly baıandap ótti. Sońǵy úsh jylda oblystyq bıýdjetten bul salaǵa 672 mlrd teńge bólinse, bıyl mektepterdi jańǵyrtý men jabdyqtaýǵa 20 mlrd teńge baǵyttalǵan, onyń 7 mlrd teńgesi demeýshilik qarajat esebinen tartylǵan. Búginde oblystaǵy 844 bilim berý uıymy, sonyń ishinde shalǵaı aýyldardaǵy mektepter de 100% joǵary jyldamdyqty ınternetpen jáne qaýipsizdik júıelerimen qamtyldy. Qurylys salasynda da oń ózgerister bar: sońǵy úsh jylda aýyldarda 8 mektep salynsa, bıyl tamyzda 220 oryndyq 2 jańa mektep qoldanysqa berildi. Al qazan aıynda Pavlodar qalasynda 1200 oryndyq zamanaýı mektep esigin ashady. Osylaısha óńirdegi apatty mektepter máselesi tolyq sheshimin tapty.
Budan bólek, bıyl 26 nysanǵa kúrdeli jóndeý júrgizilip, Pavlodar, Ekibastuz qalalary men birqatar aýdandarda Balalar shyǵarmashylyq ortalyqtary, óner mektepteri men basseınder ashyldy.
Jıyn barysynda oqý úderisine jasandy ıntellekt pen tsıfrlyq tehnologııalardy engizý, oqýshylardyń mektepten tys ýaqyttaǵy qaýipsizdigi, býllıngtiń aldyn alý jáne otbasyndaǵy zorlyq-zombylyqty boldyrmaý máseleleri de talqylandy. Osy oraıda oblysta jýyqta ǵana balalardyń quqyqtaryn qorǵaý basqarmasy qurylǵandyǵy aıtyldy. Alqaly jıyn sońynda bilim berý júıesin damytýǵa eleýli úles qosqan óńirdiń úzdik pedagogterine Pavlodar oblysynyń ákimi men QR Oqý-aǵartý mınıstriniń atynan marapattar tabystaldy.
Eske sala keteıik, pavlodarlyq oqýshy negizgi UBT-dan 140 ball aldy.
