Tamyz aıynda Túrkııanyń jyldyq ınflıatsııa deńgeıi 32,95 paıyz boldy

ASTANA.KAZINFORM — Eldegi jyldyq ınflıatsııa deńgeıi tamyz aıynda 32,95%-ǵa jetti. Bir aımen salystyrǵanda tutyný baǵasy 2,04 paıyzǵa ósti, dep habarlaıdy Kazinform agenttiginiń menshikti tilshisi. 

Túrkııa Statıstıka ınstıtýtynyń (TÜİK) málimetinshe, sońǵy 12 aıdaǵy ortasha jyldyq kórsetkishterdi eskersek, tutynýshylyq baǵa 39,62 paıyzǵa, otandyq óndirýshilerdiń ishki baǵasy 26,28 paıyzǵa ósti.

Baǵanyń ósýi ekonomıkalyq turaqtylyqqa jáne halyqtyń satyp alý qabiletine aıtarlyqtaı áser etedi. Baǵanyń ósýi ásirese azyq-túlik, turǵyn úı jáne kólik sııaqty salalarda baıqalady.

Ekonomıster Ortalyq bank pen úkimet qabyldaǵan sharalarǵa qaramastan ınflıatsııalyq qysymnyń joǵary deńgeıde qalyp otyrǵanyn, ishki jáne syrtqy ekonomıkalyq táýekelder aıasynda túrik lırasynyń qubylmalylyǵyn kórsetýdi jalǵastyrǵanyn basa aıtady.

Aldaǵy aılarda ınflıatsııa joǵarylaýy múmkin. El bıligi ekonomıkalyq ósýdi yntalandyrý jáne qymbatshylyqpen kúresý arasyndaǵy tepe-teńdikti izdeýdi jalǵastyryp jatyr.

Biz buǵan deıin TÜİK 2025 jyldyń shilde aıyndaǵy oń ınflıatsııa derekterin jarııalaǵanyn habarlaǵan edik. 

Aıta ketelik Túrkııa bıyl taýar eksportyn 390 mıllıard dollarǵa deıin jetkizýdi josparlap otyr.