Tamyz aıynda qazaqstandyqtar 137 keli altyn satyp alǵan
Ótken tamyz aıynda ekinshi deńgeıli bankter men jekelegen aıyrbastaý pýnkterinde 3 072 dana altyn quıma satyldy. Olardyń jalpy salmaǵy 137,2 kelini quraıdy. QazAqparat bul týraly Ulttyq bankke silteme jasap habarlaıdy.
Ulttyq bank halyqqa tazartylǵan altyn quımalardy satý jáne satyp alý baǵdarlamasyn 2017 jyly iske qosqan bolatyn. Osy ýaqytqa deıin jalpy salmaǵy 4,8 tonna 138 255 dana quıma satylǵan.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda eń kóp suranysqa ıe túri – 10 gramdyq altyn quımalar. Jalpy satylǵan quımalar arasynda onyń úlesi 35 842 danany (26%) quraıdy. Al 5 gramdyq altyn quımanyń 31 325 danasy (23%), 100 gramdyq quımanyń 29 381 danasy (21%), 20 gramdyq quımanyń 25 050 danasy (18%) jáne 50 gramdyq quımanyń 16 657 danasy (12%) satylǵan.
Ótken tamyz aıynda altyn kesekteri eń kóp satylǵan óńirler:
- Almaty (1 527 dana, 55%);
- Shymkent (693 dana, 25%);
- Astana (221 dana, 8%).
Baǵdarlama iske qosylǵaly ekinshi deńgeıli bankter men jekelegen aıyrbastaý pýnkteri 24 500 altyn quımany (jalpy salmaǵy 644 keli) keri satyp alǵan. Bul jalpy satylǵan kólemniń – 18%.
Salmaǵy ártúrli kesek altyndy Halyk Bank-ten, Eýrazııalyq bankten, Jusan Bank-ten, TsentrKredıt Bankinen jáne jekelegen aıyrbastaý pýnkterinen satyp alyp, keri satýǵa bolady.
Aıta keteıik, altyn quımalar senimdi ınvestıtsııa quraly bola alady.
