Tamyz aıynda áleýmettik mańyzy bar azyq-túlik baǵasy arzandady
ASTANA. KAZINFORM – Tamyz aıynda áleýmettik mańyzy bar azyq-túlik taýarlary baǵasynyń oń dınamıkasy saqtaldy.
Sońǵy aptanyń qorytyndysy boıynsha áleýmettik mańyzy bar azyq-túlik taýarlarynyń (ÁMAT) ındeksi 100,0% boldy. Tamyz aıynyń basynan beri baǵalar 0,2%-ǵa tómendedi. Jyl basynan beri ındeks 101,4%-dy qurady, al ótken jyldyń sáıkes kezeńinde bul kórsetkish 107,9% bolǵan.
Osylaısha, jyl basynan beri ÁMAT baǵasynyń ósýi eń tómen deńgeıde qalyp otyr jáne ótken jylǵy kórsetkishten 5 eseden astam tómen.
Qazirgi oń dınamıkaǵa jańa ónimniń maýsymdyq túsýi yqpal etýde. Kókónis ónimderi baǵasynyń tómendeýi jalpy ındeksti turaqtandyryp, jekelegen taýarlar boıynsha baǵanyń ósýin óteýge múmkindik berip otyr.
ÁMAT boıynsha oń dınamıka azyq-túlik ınflıatsııasynan da kórinedi. Jyldyq mánde onyń deńgeıi ótken jylǵy jeltoqsandaǵy 13,5%-dan shilde qorytyndysy boıynsha 10,1%-ǵa deıin tómendedi.
Bul rette jumys maýsymdyq sharalarmen ǵana shektelmeıdi. Negizgi nazar ónimderdiń túpkilikti qunyna tikeleı áser etetin faktorlarǵa: deldaldarǵa, naryqtarǵa, kólik shyǵyndaryna jáne óndirýshilerdiń bosatý baǵalaryna aýdaryldy.
Premer-mınıstrdiń orynbasary – ulttyq ekonomıka mınıstri Serik Jumanǵarınniń tapsyrmasy boıynsha óńirlerde azyq-túlik naryqtaryna zertteý júrgizilýde. Jetkizý tizbekteri, jaldaý sharttary jáne túpkilikti baǵanyń qalyptasýy taldanady. Artyq deldaldardy anyqtaýǵa erekshe nazar aýdarylýda.
Kólik shyǵyndaryn tómendetý maqsatynda azyq-túlik ónimderin temirjol arqyly tasymaldaýǵa jeńildikti tarıf qoldanylady. Búgingi tańda ony 50-den astam kompanııa paıdalandy, 38 myń tonna ónim tasymaldandy.
Otandyq óndirýshilermen jumys jalǵasýda. ÁMAT óndirýshileri úshin elektr energııasyna tarıfti 20%-ǵa tómendetý kózdelgen. Qoldaý bosatý baǵalaryn ustap turý boıynsha qarsy mindettemeler qabyldanǵan jaǵdaıda kórsetiledi.
Sonymen qatar turaqtandyrý qorlarynyń jumys isteý tetigi qaıta qaralýda. Tásil ónimdi jaı ǵana satyp alýǵa jáne bólingen qarajatty ıgerýge emes, naqty nátıjeni – onyń baǵaǵa áserin baǵalaýǵa baǵyttalatyn bolady.
Osy maqsatta turaqtandyrý tetikteri naqty taýar men óńirdegi jaǵdaıǵa qaraı nysanaly túrde qoldanylatyn bolady. Sondaı-aq ónim qozǵalysynyń qadaǵalanýyn jáne SPK arqyly baǵyttalatyn qarajattyń tıimdiligine baqylaýdy kúsheıtý josparlanýda.
Jyl sońyna deıingi jumys qol jetkizilgen oń dınamıkany saqtaýǵa, azyq-túlik ónimderiniń jetkilikti kólemin qamtamasyz etýge jáne baǵanyń negizsiz ósýine jol bermeýge baǵyttalady.
Aıta ketelik elimizde qandaı azyq-túlik ónimderiniń baǵasy tómendegeni týraly jazǵan edik.
