Tamara Dúısenovaǵa mańyzdy jobany iske asyrý mindeti júkteldi
Atalǵan jobanyń negizgi maqsaty - múmkindigi shekteýli jandardyń ómir sapasyn arttyrý, olardyń júrip-turý jaǵdaıyn jaqsartý.
«Qazirgi kezde biz osy jobany qaıta qarap, onyń mańyzdylyǵyn kúsheıtýdi kózdeımiz. Sonyń aıasynda naqty kómek berilýi shart, naqty jumystar atqarylýy qajet. Osy oraıda, biz naqty tórt basymdyqty belgiledik. Birinshiden, múmkindigi shekteýli jandardyń erkin júrip-turýyna yńǵaıly ári kedergisiz jaǵdaı jasalýy qajet. Ekinshiden, osy sanattaǵy balalardyń ınklıýzıvti bilim alýyna kómektesýimiz kerek. Úshinshiden, múgedekterge turaqty jumysqa turýyna qamqorlyq jasaý. Olar aqsha taýyp, ózin-ózi asyraı bilýi kerek. Tórtinshiden, osy saladaǵy zańnamany jetildirý. Dál osy tórt basymdyqtyń aıasynda biz «Kedergisiz keleshek» jobasyn qaıta jasaqtap, naqty jumys jasaıtyn bolamyz», - dedi M.Áshimbaev Astanada ótken keńeste.
Onyń aıtýynsha, ortaq jumysqa úkimettik emes uıymdar da atsalysýy qajet. «Kedergisiz keleshek» jobasy naqty nátıje berý shart.
«Erteń jaı statıstıkamen aınylysyp ketpeıik, monıtorıng jasap jáne taǵysyn taǵy. Bizdiń jobamyz múmkindigi shekteýli jandardyń jaǵdaıyn jaqsartýy qajet. Partııa tarapynan bul máseleni Tamara Dúısenova (Nur Otan» partııasynyń hatshysy- avt.) úılestiretin bolady. Bul kisini bárińiz jaqsy bilesizder. Ol xalyqty áleýmettik qorǵaý salasynda biraz ýaqyt eńbek etti. Mınıstr boldy. Tájirıbesi mol. Onymen birge biz «Kedergisiz keleshek» jobasyna jańasha serpin berýimiz kerek», - dep atap kórsetti M.Áshimbaev.
Aıta keteıik, Astana qalasynyń ákimi Áset Isekeshev múmkindigi shekteýli jandarǵa jaǵdaı jasaý máselesi boıynsha esep berdi. Al «ELAMAN» áleýmettik-ınnovatsııalyq jobalar qorynyń tóraǵasy Almaz Erjan múgedekterge jaǵdaı jasaýdyń kemshin tustaryn atady. "Pandýs, pandýs deımiz. Mysaly, dál qazir men ákimdikke qalaı kirdim? Bul jerde deni durys pandýs ta joq. Sol úshin ákimdikti nege jaýapqa tartpaıdy? Nege aıyppul salmaıdy? Nege ákimdikti eshkim teksermeıdi? «Nur Otan» partııasynyń bas keńsesin alaıyq, ol jaqta múgedekterge arnalǵan dáretxana joq. Ol da durys emes. Zań boıynsha múmkindigi shekteýli adamdardyń quqyǵy da shektelip otyr», - dep atap kórsetti uıym basshysy.
