Tamara Dúısenova Túrkistan oblysynda bilim berý sapasyn arttyrý boıynsha keńes ótkizdi

ASTANA. KAZINFORM - QR Premer-Mınıstriniń orynbasary Tamara Dúısenova Túrkistan oblysyna jumys saparymen baryp, bilim berý sapasyn arttyrý máseleleri boıynsha keńes ótkizdi, dep habarlaıdy Úkimettiń baspasóz qyzmeti.

Vıtse-premer Túrkistan qalasyndaǵy «Jańa qala» shaǵyn aýdanynda «Jaıly mektep» ulttyq jobasy sheńberinde salynyp jatqan jańa oqý ornynyń qurylysymen tanysty. Munda turǵyn úı qurylysynyń belsendi júrýi mektepterge júktemeni arttyrýda. Sol sebepti de ulttyq joba aıasyndaǵy mektepterdiń birin osynda salý týraly sheshim qabyldandy. Jańa bilim oshaǵynyń qurylys jumystary aıaqtalýǵa jaqyn. 2 myń oryndyq nysan qazan aıynda paıdalanýǵa beriledi dep josparlanyp otyr. Qazir óńirde bes mektep úsh aýysymda jumys istep tur. Bul másele ulttyq joba aıasynda jańa mektepter salý arqyly sheshilmek.

«Balalardyń alańsyz bilim alýyna barlyq jaǵdaı jasalýy kerek. Muǵalimderge, olardyń biliktiligine erekshe nazar aýdarǵan jón. Balalarymyzdyń zamanaýı jabdyqtalǵan mektepterde bilim alýy úshin osy ulttyq joba bastaldy», - dedi Tamara Dúısenova.

Sonymen qatar vıtse-premer №28 mektepke de baryp, bilim berý salasyndaǵy tsıfrlyq sheshimdermen tanysty. «Alaqan» júıesi oqýshylarǵa bıometrııalyq baqylaý arqyly ǵımaratqa kirýge, ashana men kitaphanany paıdalanýǵa múmkindik beredi. Tamara Dúısenova balalardyń jeke derekteriniń qorǵalýy qajettigine erekshe nazar aýdardy.

Oblysta mektep oqýshylaryn tegin tamaqtandyrýdy qamtamasyz etý úshin «Áleýmettik ámııan» mehanızmin engizý boıynsha belsendi jumystar júrgizilýde. Vıtse-premer bul shara ata-analarǵa tıisti úrdisti onlaın rejımde baqylaýǵa múmkindik beretinin, al bıýdjet qarjysy naqty kórsetilgen qyzmet úshin tólenip, maqsatty jumsalýyn qamtamasyz etetinin atap ótti.

QR Premer-Mınıstriniń orynbasaryna mektepke deıingi bilim berýdi vaýcherlik qarjylandyrý jobasy tanystyryldy. Bul jaǵdaıda ata-analar balalaryn balabaqshaǵa emes, jergilikti bıýdjetten bólingen vaýcherlerge kezekke qoıady.

Budan bólek, vıtse-premerdiń tóraǵalyǵymen óńirdegi mektepter men kolledjder basshylarynyń qatysýymen bilim sapasyn arttyrý máseleleri boıynsha keńes ótti. Óńirde Prezıdenttiń tapsyrmalaryn oryndaý sheńberinde mekteptermen keshendi jumys júrgizilýde. Halyqaralyq jáne ishki zertteýler nátıjeleri boıynsha bilim berý nysandary 3 sanatqa bólindi. Ár sanat úshin KPI anyqtaldy.

Aıta keteıik, Túrkistan oblysynda 280-nen astam mektep «Nysanaly mektepter» retinde belgilengen. Bul mektepterdiń muǵalimderin úsh deńgeıli oqytý qarastyrylǵan. Olar mınıstrlik janyndaǵy ınstıtýttardan ádistemelik kómek alady.

Sondaı-aq keńeste tehnıkalyq jáne kásiptik bilim berý salasyn transformatsııalaý boıynsha qabyldanatyn sharalar týraly aıtyldy. Atap aıtqanda, jan basyna qarjylandyrý normatıvi qaıta qaralyp, bazalyq jáne yntalandyrýshy bólikke bólinedi. Halyqaralyq standarttardy engizgen jáne túlekterin joǵary jalaqy tólenetin jumys oryndaryna jumysqa ornalastyrǵan kolledjder joǵary qarjylaı qoldaý ala alady.