Tamara Dúısenova shahterler ólimi týraly: Úkimettiń kinási joq dep aıta almaımyn
«ArsellorMıttal Temirtaýdyń» aktsıonerleri Ýkraına, Germanııa sııaqty elderde óndiris qaýipsizdigin saqtaıdy da, nelikten Qazaqstandaǵy talaptarǵa salǵyrt qaraıdy? Úkimet otyrysynan keıin ótip jatqan baspasóz konferentsııasynda jýrnalıst Premer-Mınıstrdiń orynbasary Tamara Dúısenovaǵa osyndaı suraq qoıdy, dep habarlaıdy Kazinform agenttigi.
«Eńbek qaýipsizdigine baılanysty standarttardyń bári Mıttaldyń aldyna, kompanııanyń aldyna qoıylǵan. Ýkraınada dál osyndaı jaǵdaı boldy. Men ol kompanııanyń sheteldegi kásiporyndaryna baryp, jumys oryndarymen tanysqanmyn. Qondyrǵylar qandaı, olar jumyskerlerge qandaı jaǵdaı jasap otyrǵanyn kórdim. Endi barlyq jerde keremet jasap qoıypty dep aıta almaımyn. Sonyń ishinde bizdiń máselemizge olardyń salǵyrttyǵy bolǵan. Sońǵy jyldary ol kisilerge jumys oryndary jóninde óte qatty eskertý bergenbiz», — dedi Tamara Dúısenova.
Jýrnalıst «Investordyń salǵyrttyq tanytýyna Úkimettiń jemqorlyǵy áser etken joq pa?» dep surady.
«Sońǵy úsh jyldyń ishinde biz qoıǵan talaptardy kezeń-kezeńimen oryndaı bastady. Biraq bárin jolǵa qoıdy dep aıta almaımyn. Sebebi óndiris qaýipsizdigi boıynsha olardyń óz talaptary da bolǵan. „ArselorMıttal“ — 100 paıyz jeke kompanııa. Úkimettiń eshqandaı qatysy joq. Sondyqtan úkimet tarapynan jemqorlyq bar dep aıtýǵa bolmaıdy», — dedi vıtse-premer.
«ıAǵnı, úkimettiń bul jerde kinási joq pa?» dep naqtylady BAQ ókili.
Úkimet basshysynyń orynbasary olaı dep kesip aıtýǵa bolmaıtynyn jetkizdi.
«Úkimettiń kinási joq dep aıta almaımyz. Árıne, baqylaýda kemshilikter bolýy múmkin, bolady da. Sebebi adam faktory bar jerde barlyq ýaqytta ondaı bolady. Degenmen bul jerde Mıttaldyń, jalpy kásiporynnyń kinási kóbirek dep oılaımyn», — dedi vıtse-premer.
