Tamara Dúısenova neırohırýrgııa salasyndaǵy problemalardy atady

ASTANA. QazAqparat – Premer-Mınıstrdiń orynbasary, Eńbek jáne halyqty áleýmettik qorǵaý mınıstri Tamara Dúısenova otandyq neırohırýrgııa salasyndaǵy sheshimin tappaǵan birneshe máseleni kóterdi, dep habarlaıdy QazAqparat tilshisi.

«Otandyq neırohırýrgııa salasyna qatysty birer máseleni kótereıin degen em. Árıne, salanyń búgingi jetistigi qýantady, ortalyq basshysy aıtqandaı, neırohırýrgtar 3-5-shi deńgeıdegi qıyn otalardy jasap jatyr. Aldymen ólim-jitim kóp tirkeletin 5 medıtsına salasy boıynsha el ishinde profılaktıkalyq jumysty kúsheıtý mańyzdy. Onyń ishinde neırohırýrgııa da bar. Ekinshi másele, aýdan ortalyqtary men eldimekenderde neırohırýrgııany damytý jáne qural-jabdyqpen qamtý. Bul másele tek neırohırýrgııaǵa ǵana emes, sol sııaqty kardıohırýrgııa, onkologııaǵa da qatysty. Ókinishke qaraı, qansha jerden jańa tehnologııa engizilip jatsa da, keıbir aýrýlar jasaryp keledi»,- dedi Tamara Dúısenova elordada ótip jatqan neırohırýrgtardyń V kongresinde.

Odan bólek, Úkimet basshysynyń orynbasary kadr máselesin qozǵady.

«Kadr qandaı sala úshin de mańyzdy. Biz mamandardyń biliktiligin únemi arttyryp otyrýymyz kerek. Ásirese jergilikti jerlerde, ıaǵnı aýdan mamandaryn. Kelesi másele ońaltý jumystary. Otadan keıin patsıent ońaltý sharasynan ótedi. Іri qalalar men oblys ortalyqtarynda bul sharýa jolǵa qoıylǵan, al aýdandarda nazardy qajet etedi», - deıdi mınıstr.