Tamara Dúısenova menıngokokk órshýi jaıynda: Sebebimen emes, saldarymen kúresip jatyrmyz
«Sizder naýqaspen baılanysta bolǵandarmen jan-jaqty jumys júrgizgenderińizdi qalaımyz. Árbir óńirde tetikteri aıqyndalǵan. Aýlalardy aralaıtyndyqtaryńyzdy nemese uıymdastyrylǵan toppen úılerge baratyndyqtaryńyzdy bilesizder. Qazir biz derttiń saldarymen kúresip jatyrmyz. Eń aldymen sebebimen anyqtaýymyz qajet edi», - dedi Tamara Dúısenova «Nur Otannyń» ortalyq apparatynda barlyq óńirlermen beınekonferentsııa arqyly ótken jıynda.
Onyń aıtýynsha, ýchaskelik dárigerden bastap oblystyq densaýlyq saqtaý basqarmasynyń bastyǵyna deıin bul jumysqa jumyldyrylýy tıis. Sonymen qatar Tamara Dúısenova «Nur Otannyń» barlyq fılıaldarynyń birinshi basshylaryn juqpadan qaza tapqandarmen baılanysta bolǵandardyń jiti tekserilýin nazarda ustaýy qajettigin basa aıtty.
«Baılanysta bolǵandar elimiz boıynsha kóp emes, 4 myń adamdy quraıdy. Olardy tekserý qalaı júrip jatyr jáne qajet bolsa aýrýhanaǵa jatqyzylýyn qamtamasyz etý qajet. Dári-dármek qor men rezervtik tósek-orynǵa qatysty máselesi sheshilgen dep oılaımyn. Dárigerlerge keńes berý úshin respýblıkalyq deńgeıde barlyq telekommýnıkatsııalyq tehnologııalardy iske qosqan jón bolar. Medıtsına qyzmetkerlerine nusqaýlyq berip, halyqty jappaı aqparattandyrý qajet», - dedi partııa hatshysy.
Sonymen qatar Tamara Dúısenova menıngokokke shaldyqqandardyń barlyǵyn bir antıbıotıkpen emdeýge bolmaıtyndyǵyn aıtqan edi.
