Tamara Dúısenova memlekettik qyzmetshilerge kúızeliske túspeýdiń jolyn úıretti
Tamara Dúısenovamen kezdesý kezinde Aqtóbedegi memlekettik qyzmetkerler jumys kúnin josparlaý, kúızelisten shyǵý jáne bilim jetildirý týraly suraqtaryn qoıdy. Jumys jolyn aýdandyq ákimdikten bastap, mınıstrge deıin kóterilgen maman «Ózge elde sultan bolǵansha, óz elińde ultan bol» degen bir aýyz sózge toqtap, Ózbekstandaǵy joǵary oqý ornyn aıaqataǵan soń aýylyna oralǵanyn aıtty.
«Adam «men ne úshin osy qyzmette otyrmyn» degen saýaldy ózine qoıýy kerek. Tańerteńnen keshke deıin jumys istep, eńbekaqy alý úshin emes, «meniń jumysymnyń halyqqa qandaı paıdasy tıip jatyr» degen baǵytta eńbektengen jón. Jaqsy jumys istegen belsendi, bilimdi azamat ósedi. Bireýdiń úlken aǵasy bar dep oılaýdyń qajeti joq. Eger bilimdi bolsań, alǵa jyljý bolady»,- dedi Tamara Dúısenova.
Eks-mınıstr batyrlar jyryn oqyp, erligimen el esinde qalǵan azamattardyń ómirine qatty qyzyǵady. Tipti, ózi úlgi tutqan azamattardyń deńgeıine jetý úshin bar kúsh-jigerin jumysqa arnaǵan.
«Men ekonomıka salasyndaǵy kitaptardy jıi oqımyn. Sebebi, álem kúnde ózgeredi, tehnologııa damyp keledi. Búgingi bilimmen naryqqa ilesý múmkin emes. Jańalyqtar ashyp, zamanaýı mehanızmdi meńgerý shart. Qazir Qazaqstanda 100 kitap aýdarylyp jatyr. Onyń 18-i qolǵa tıdi. Bárin oqyp, oı-tanymdy keńitý kerek. Men týraly «24 saǵat jumys isteıtin azamat» dep aıtady. Eger jumysta sál ǵana alǵa jyljyǵanymdy túsinsem, sodan energııa alamyn. Aýyl ákiminiń jumysy aýyr. Azamattar aldymen ákimnen kómek suraıdy. Memlekettik qyzmetkerdi kórip, bılikti synaıdy. Keıde másele sheshilmeıdi. Birden «muny sheshe almaımyn» dep adamdy keri qaıtaryp jiberýge bolmaıdy. Aldyńa kelgen azamatqa ol máseleniń nelikten sheshilmeıtinin jetkize bilgen durys. Bul - memlekettik qyzmetkerdiń óz-ózin qurmettegeni. Kúızelis ishimdik iship, shylym shegýmen sheshilmeıdi. Ol adamnyń parasattylyǵyna baılanysty»,- dedi ol.
Eks-mınıstr tyǵyryqtan shyǵar jol árqashan tabylatynyn aıtty.
«Kúızeliske túspegen durys. Tyǵyryqtan shyǵar jol tabylady. Kóbine biz óz-ózimizdi baqylaı almaı, qıyndyqqa tap bolamyz. Al mansap pen otbasyny qatar alyp júrý máselesine keler bolsam, túk qıyndyǵy joq. Adamda eki emes, bir ǵana ómir bar. Jumysta basqa, otbasynda basqa adam bolý múmkin emes. Ýaqytymnyń kóp bóligin jumysqa arnaıtyn kezim bolady. Keıde tańerteń erte turyp, balammen sóılesemin. Kesh kelgen kezde ulym esik aldynda turyp, Ánuran aıtady. Ol renjigeni. Keıin bir demalysymdy arnaımyn. Biraq balam qoǵamdaǵy atqaryp júrgen jumysymdy biledi, syılaıdy»,- dedi T.Dúısenova.
Ol ár aptany josparlap, ony iske asyrýdy mindet sanaıdy. Jospar jasalyp, biraq oryndalmasa - aptanyń bosqa ótkeni.
Kezdesý kezinde Elbasynyń «Rýhanı jańǵyrý» baǵdarlamasynyń aıasynda memlekettik qyzmetshilerdiń arasynda «Oqy, jetil jáne bólis»atty chellendj bastaldy.
