Tamara Dúısenova mektep medıtsınasyndaǵy ózgeristerdi atap berdi
ASTANA. QazAqparat - Bilim berý júıesindegi medıtsınalyq pýnkter emhanalardyń qurylymyna enedi. Bul týraly búgin QR Densaýlyq saqtaý mınıstri Tamara Dúısenova málim etti.
«Zań jobasy qarastyratyn máselege toqtalatyn bolsaq, mektep medıtsınasyn bilim berý júıesinen densaýlyq saqtaý salasyna aýystyrýǵa baılanysty. 2018 jyldyń 1 qańtarynan bastap memleket balalar úshin medıtsınalyq saqtandyrý qoryna jarnalardy tóleıdi. Sondyqtan balalarǵa medıtsınalyq kómek kórsetý kelesi jyldan medıtsınalyq saqtandyrý qorynan iske asyrylady. Al búginde bul baǵyttaǵy sharalar bilim berý júıesi tarapynan atqarylýda. Osy rette mektep medıtsınasyn bilim júıesinen aýystyrýdy qarastyratyn alǵyshart bolyp tabylady»,-dep toqtaldy mınıstr.
Onyń sózine qaraǵanda, mektep medıtsınasyn jaýapty vedomstvoǵa aýystyrý aıasynda uıymdastyrýshylyq ózgerister qamtylady. Osy oraıda endi bilim berý júıesindegi medıtsınalyq pýnkter emhanalardyń qurylymdyq bólimsheleri bolady.
«Al medıtsınalyq mamandar shtattaǵy qyzmetkerler qataryna engiziledi. Profılaktıkalyq tekserýlerdi tikeleı emhananyń mamandary ótkizedi. Sonymen qatar bul baǵytta mektep oqýshylaryn temekini, alkogol men esirtki zattaryn paıdalaný turǵysyndaǵy kezeńdik testileý de qamtylady. Profılaktıkalyq tekserý qorytyndysy boıynsha balalardy saýyqtyrý sharalary iske asyrylady»,-dep túsindirdi T. Dúısenova.
Óz kezeginde Úkimet músheleri zań jobasynda qamtylyp otyrǵan bul bastamalardy biraýyzdan qoldady. Endi zańnamalyq qujat Parlament qaraýyna engizilýge ázir tur.
Budan buryn habarlanǵandaı, Úkimet otyrysynda T. Dúısenova Mınıstrler kabınetiniń nazaryna «Qazaqstan Respýblıkasynyń kekıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» QR zań jobasyn usyndy.
«Zań jobasy eki máseleni qarastyrylady. Birinshisi, medıtsınalyq saqtandyrý qoryna jarnany tóleý merzimin jarty jylǵa shegerýge baılanysty. Osy rette jumys berýshiler jáne ózin jumyspen qamtyǵan azamattardan jarnalar men tólemder 2017 jyldyń 1 qańtarynan emes, 1 shildesinen iske asyrylady. Sonymen qatar memleket halyqtyń belsendi emes bóligi úshin jarnany jarty jylǵa keıin tóleıdi, ıaǵnı 2018 jyldyń 1 qańtarynan bastap tólem jasaıdy. Sáıkesinshe, medıtsınalyq saqtandyrý júıesiniń medıtsınalyq kómek kórsetý men qordan tólem jasaý da jarty jylǵa keıin bastalady (2018 jyldyń 1 qańtarynan bastap)», - dep naqtylady mınıstr.
