Tamara Dúısenova: Eńbek ınspektsııasyn jergilikti ákimdikke berý qate sheshim boldy

Búginde jergilikti ákimdikterge qaraıtyn eńbek ınspektsııasy Eńbek jáne halyqty áleýmettik qorǵaý mınıstrligine qaıtarylady. Bul týraly Jibek Joly telearnasynyń «Ýáde» baǵdarlamasyna suhbat bergen Premer-Mınıstrdiń orynbasary Tamara Dúısenova aıtty, dep habarlaıdy Kazinform.

Onyń atap ótýinshe, 2013-2014 jyldary ortalyq organdardyń kóptegen qyzmeti jergilikti jerlerge berildi.

Sol ýaqytta Eńbek mınıstrliginiń quramynda bolǵan Eńbek ınspektsııasy da jergilikti jerlerdegi máselelerdi jedel sheshý úshin óńir ákimderine ótti.

«Árıne, olar jumys istep jatqan joq dep aıta almaımyn. Biraq, ol qate sheshimderdiń biri dep esepteımin. Sondyqtan mınıstrlikte júrgen kezimde de usynys jasadyq. Qazir osy usynysymyzdy Úkimet te qoldap otyr. Zańǵa engizý máselesin qarastyryp jatyrmyz. Eńbek ınspektsııasy qaıtadan Eńbek mınıstrligine qaıtarylyp, eńbek zańnamasyn birtutas qadaǵalap otyratyn táýelsiz baqylaýshy organ retinde qurylady», - dedi Tamara Dúısenova.