Tamara Dúısenova BQO-da «Aýyl amanaty» baǵdarlamasynyń júzege asyrylý barysymen tanysty
ASTANA. KAZINFORM – Vıtse-premer Tamara Dúısenova Batys Qazaqstan oblysyna jumys sapary barysynda óńirdiń aýdandary men aýyldarynda «Aýyl amanaty» baǵdarlamasynyń iske asyrylýymen tanysty. Baǵdarlama aýyl turǵyndarynyń tabysyn arttyrýǵa jáne ómir súrý sapasyn jaqsartýǵa baǵyttalǵan, dep habarlady Úkimettiń baspasóz qyzmeti.
Byltyr baǵdarlama aıasynda BQO Bókeı ordasy, Jańaqala, Jánibek jáne Kaztalov aýdandarynyń 273 turǵyny óz isin damytý úshin jalpy somasy 1,5 mlrd teńgege nesıe aldy. Qarajattyń kóp bóligi mal basyn kóbeıtýge baǵyttaldy, bul aýyl turǵyndaryna sút jáne et ónimderin óndirýmen jáne satýmen tabysty aınalysýǵa múmkindik berdi.
Máselen, Han ordasy aýylynyń turǵyny Svetlana Sarıeva 4 mln teńgege 8 bas sútti sıyr satyp alǵan. Qaımaq, maı jáne irimshik óndirisi onyń otbasyna turaqty tabys ákelýde. Bir jyl buryn jumyssyz bolǵan S.Sarıeva endi aýyl turǵyndaryn jumyspen qamtamasyz ete otyryp, sharýashylyǵyn keńeıtýdi josparlap otyr.
Tamara Dúısenova baǵdarlamany iske asyrýdyń sátti mysaldarymen tanysyp, Batys Qazaqstan oblysy óńirleriniń turǵyndaryna aýyl azamattaryn qoldaýǵa baǵyttalǵan 9 baǵdarlamanyń sharttaryn túsindirdi. Olardyń ishinde — 5 jylǵa deıingi merzimge eń kóp qaryz somasy 5 mln teńgeni 2,5%-ben jastar úshin jeńildetilgen shaǵyn nesıe alý múmkindigi bar. Budan basqa, halyqtyń áleýmettik osal sanattary úshin 1,4 mln teńgeden astam somaǵa qaıtarymsyz granttar kózdelgen.
Vıtse-premer bul aýyr turmys jaǵdaıyna tap bolǵan adamdar úshin jaqsy múmkindik ekenin atap ótti.
«Aýdandarda memlekettik baǵdarlamalar boıynsha túsindirý jumystary nashar júrgizilýde. Aýyldar men aýdan ákimderi osy jaýapty baǵytta belsendilik tanytýǵa tıis. Árbir otbasynyń ál-aýqatyn arttyrý úshin memleket bergen múmkindikter jekelegen aýyldyń ǵana emes, búkil eldiń bolashaǵyna qosqan úlesi sanalady», — dep atap ótti Tamara Dúısenova.
