Tamara Dúısenova áıelder arasyndaǵy jumyssyzdyqtyń órship ketýinen seskenedi
ASTANA. QazAqparat - QR Eńbek jáne áleýmettik qorǵaý mınıstri Tamara Dúısenova eńbekke jaramdy jastaǵy áıelder arasynda jumyssyzdyqtyń órship ketý qaýpi baryn aıtty, dep habarlaıdy QazAqparat.
Onyń aıtýynsha, atalmysh problema barlyq álem elderinde baıqala bastaǵan. Halyqaralyq eńbek uıymynyń sarapshylarynyń aıtýynsha, álemde 29-34 jastaǵy áıelder arasynda jumyssyzdyq beleń alǵan.
«Bizdegi jaǵdaı ózgeshe, sebebi bizdiń ómir saltymyz ben ekonomıkamyz basqa. Bizde jumyssyz qalýdyń úlken qaýipi 45 jastan keıin nemese 15 pen 24 jas aralyǵynda kóbeıedi. Bul bizdiń erekshelik pen demografııalyq úrdisimizge táýeldi dese de bolady. Eger biz bolashaqta álemdegi osy jumyssyzdyq úrdisimen aldyn ala kúrespeıtin bolsaq, Qazaqstandaǵy jaǵdaı álemdegi jumyssyzdyqpen para-par bolyp ketýi de ǵajap emes», - dedi Dúısenova Astanada «Korporatıvtik sektorda áıelderdiń múmkindikterin keńeıtý» atty halyqaralyq forýmda.
Mınıstrdiń málimetteri boıynsha, búgingi tańda Qazaqstanda 3,1 mıllıon áıel jaldamaly jumysshy retinde eńbek etýde. 2010 jyldan beri olardyń sany 650 myńǵa artqany baıqalýda.
Qazaqstandyq áıelderdiń 19%-y saýda-sattyqta, 18%-y - bilim berý jáne densaýlyq saqtaý salalarynda, 8,6%-y - áleýmettik qyzmet kórsetý salalarynda qyzmet etedi. Jumyssyz sanatqa kiretin áıelderdiń 3/1-i bala kútimine baılanysty eńbek demalysynda júr.
