Tamara Dúısenova áıel men erkek jalaqysynyń teńsizdigine qatysty pikir bildirdi
ASTANA. QazAqparat - QR Eńbek jáne halyqty áleýmettik qorǵaý mınıstri Tamara Dúısenova áıel men er-azamattardyń jalaqylarynyń teńsizdigine qatysty pikir bildirdi, dep habarlaıdy QazAqparat.
«Jalaqy máselesine qatysty mynany atap ótkim keledi. Eger Astana, Aqtóbe jáne Ońtústik Qazaqstan oblysynda matematıkadan sabaq beretin áıel ustazdardy alyp qaraıtyn bolsaq, onda olar birdeı jalaqy alady. Sebebi olardyń bilim berý standarttary birkelki. Eger taý-ken óndirisi salasynda, zııandy óndiriste jumys isteıtinderdiń jalaqysy zııandy óndiriste jumys istemeıtinderge qaraǵanda, árıne aıyrmashylyǵy bar. Óıtkeni, jumystary qıyn ári birshama ereksheligi bar. Osyǵan oraı, jalaqyda kemsitýshilik bar deıtindermen kelispeımin. Barlyǵy jumys kólemine, qıyndyǵyna jáne jaǵdaıǵa baılanysty», - dedi mınıstr búgin Úkimet úıinde ótken baspasóz máslıhaty barysynda.
Onyń atap ótýinshe, elimizde áıelder negizinen qyzmet kórsetý jáne áleýmettik salalarda jumys isteıdi.
«Bizde áıelderdiń jumys isteýine tyıym salynǵan óndirsterdiń tizimi bar. Eńbek kodeksinde de júkti, 1 jasqa tolmaǵan, 3 jasqa tolmaǵan balasy bar áıelder úshin óte kóp jeńildikter qarastyrylǵan. Munyń barlyǵy da jalaqyǵa áser etedi», - dedi Tamara Dúısenova.
Aıta keteıik, 7 naýryz kúni Elbasy Nursultan Nazarbaev Qazaqstannyń áıelder qaýymy ókilderimen «Kóktem shýaǵy» atty kezdesý barysynda áıelderdiń ortasha kiris deńgeıi erkektermen salystyrǵanda áli kúnge deıin úshten bir mólsherge tómen ekendigin aıtqan bolatyn. «Mundaı jaǵdaıdyń oryn alýynyń basty sebebiniń biri Úkimet bekitken Áıelder eńbegin qoldanýǵa tyıym salynǵan jumystar tizimi», - degen edi Nursultan Nazarbaev.
