Tamara Dúısenova «Aýyl amanaty» jobasynyń Aqmola oblysynda iske asyrylý barysyn tekserdi
ASTANA. KAZINFORM – QR Premer-Mınıstriniń orynbasary Tamara Dúısenova «Aýyl amanaty» jobasynyń Aqmola oblysynda iske asyrylý barysyn tekserip, birqatar áleýmettik nysandy aralady. Bul týraly QR Úkimetiniń baspasóz qyzmeti málim etti.
Memleket basshysy Qazaqstan halqyna Joldaýynda «Aýyl amanaty» jobasyna oń baǵa berdi. Aýyl turǵyndarynyń tabysyn arttyrý baǵdarlamasy óz kásibin ashýǵa, jumyssyz azamattardy jumysqa ornalastyrýǵa yqpal etedi. Osy maqsatta 2,5%-ben shaǵyn nesıeler beriledi. Tamara Dúısenova Atbasar aýdanynda turǵyndar bıznes-ıdeıalaryn júzege asyrý barysymen tanysty.
«Aýyl amanaty» jobasyna qatysýshylardyń biri, Atbasar aýdanynyń turǵyny Vıtalıı Dýbının 3,5 mln teńgege kólik jóndeý stansasyn ashty. Al, Aıda Meıramova naýbaıhana jumysyn uıymdastyryp, 8,6 mln teńgege jeńildigi bar nesıe alǵan. Qazirgi tańda naýbaıhana 16 adamdy jumyspen qamtyp otyr.
«Jumysty nólden bastadyq, búginde halyq arasynda suranysqa ıe óndiriske aınalyp otyrmyz. Nesıelik qarajatqa qamyr ılegish pen 120 toqashtyq pesh satyp alyndy. Biz nan ónimderiniń 20 túrine deıin pisiremiz», — dep, Aıda Meıramova oıymen bólisti.
Tamara Dúısenovaǵa «Aýyl amanaty» jobasyna qatysýshylar shyǵarǵan ónimderdiń óńirlik kórmesi usynyldy. Vıtse-premer baǵdarlama qatysýshylarymen áńgimelesý barysynda óndiriste tereń óńdeýdi damytýdyń mańyzdy ekenin atap ótti.
Premer-Mınıstrdiń orynbasary óńir basshysy Marat Ahmetjanovpen birlesip oblystyń aýdandary men aýyldyq okrýgteri ákimderiniń qatysýymen baǵdarlamany iske asyrý jóninde keńes ótkizdi. Onda basqa da salalarda júzege asqan úzdik jobalar qaraldy. Qyzylorda óńirinen kelgen «Baıqońyr» ÁKK basqarma tóraǵasy Ǵızat Ábiltaı jobany jergilikti áleýmettik-kásipkerlik korporatsııalar arqyly qoldaý jónindegi tájirıbeni aıtty. Kooperatsııa baǵytyndaǵy úlgili aýyl retinde BQO Qaratóbe aýdanyndaǵy Qoskól aýyly tanystyryldy. Sondaı-aq keńeske qatysýshylar mektepterdi azyq-túlikpen tıimdi qamtamasyz etý, ónimdi óńdeý jáne eksport boıynsha keıstermen tanysty.
«Jergilikti jerlerde aýyl ákimderi halyqpen tyǵyz jumys isteıdi. Olar azamattarǵa memlekettik qoldaýdyń neǵurlym tıimdi sharalaryn usynýǵa tıis. Tek osy jaǵdaıda ǵana biz basty maqsat – aýyl turǵyndarynyń ál-aýqatyn arttyrýǵa qol jetkizemiz. Memleket jeńildigi bar nesıelerden basqa, bıznesti bastaý úshin granttar, sýbsıdııalanǵan jumys oryndaryn usynady. Osy múmkindikterdiń barlyǵyn paıdalana otyryp, jaqsy nátıjelerge qol jetkizýge bolady», — dep atap ótti Tamara Dúısenova.
Aqmola oblysynyń ákimi Marat Ahmetjanov memlekettik qoldaý sharasy aýyl sharýashylyǵy bıznesin damytýdyń tıimdi quraly sanalatynyn atap ótti.
«Óńirde «Aýyl amanaty» baǵdarlamasy boıynsha túrli baǵyttaǵy jobalar – mal sharýashylyǵy, tigin jáne bylǵary óndirisi, sút pen shujyq ónimderin daıyndaý jáne basqa da salalarǵa qarajat berildi. Endi tutynýdan óndiriske kóshý kerek. Bul jumys ornyn ashyp, tabys ákeledi. Bıýdjet halyqtyń ıgiligi úshin jumys isteýi kerek», — dedi Marat Ahmetjanov.
Qazaqstanda dárilik zattardy tańbalaý jáne baqylaý júıesi engizildi. Bul shara elge ákelingen nemese óndirilgen sátten bastap patsıenttiń statsıonarda paıdalanýyna nemese dárihanalarda satyp alýyna deıin preparattar qozǵalysynyń ashyqtyǵyn qamtamasyz etýge arnalǵan. Tamara Dúısenova Kókshetaý qalasy dárihanalary biriniń bazasynda júıeniń jumysymen tanysty. Sondaı-aq oblystyq aýrýhanada dári-dármekterdi qabyldaý jáne bosatý protsedýrasy kórsetildi.
Densaýlyq saqtaý salasyn damytýdyń ózekti máseleleri óńirdegi medıtsınalyq mekemelerdiń bas dárigerleriniń qatysýymen ótken keńeste qaraldy. Talqylaýdyń negizgi taqyryby – Prezıdenttiń tapsyrmalaryn oryndaý. Búgingi tańda kepildendirilgen bazalyq jáne saqtandyrý bólikterinen turatyn medıtsınalyq kómektiń biryńǵaı paketin qalyptastyrý mindeti ózekti. Barlyq óńirde saqtandyrylmaǵan azamattardy júıege tartý boıynsha jumys belsendi júrgizilip jatyr.
«Árbir saqtandyrylǵan azamat aýdarymdar kólemine qaramastan, eresekterdiń stomatologııasy men kosmetologııasyna baılanysty qyzmetterdi qospaǵanda, saqtandyrý sheńberinde barlyq qajetti medıtsınalyq kómekti alýy tıis. Aýrýdy erte anyqtaý boıynsha jumysty kúsheıtý qajet», — dedi Tamara Dúısenova.
Aqmola oblysyna jumys sapary aıasynda sportty damytý máseleleri boıynsha keńes ótkizilip, sporttyq uıymdar men mektep basshylary qatysty. Týrızm jáne sport vıtse-mınıstri Serik Jarasbaev óz baıandamasynda usynylyp otyrǵan negizgi ózgeristerge toqtalyp ótti. Olar sport túrlerine basymdyq berý, jan basyna shaqqandaǵy qarjylandyrý tetigin engizý, sportshy daıyndaýdyń kóp deńgeıli, sabaqtas júıesin túzý, salany tsıfrlandyrýǵa qatysty boldy. Keńes barysynda sport mektepteriniń basshylary ózderin mazalaǵan saýaldardy joldap, sport salasyn damytýǵa qatysty pikirlerin aıtty.
Vıtse-premer usynylǵan normalar barlyq múddeli taraptarmen talqylanatynyna basa mán berdi. Kezdesý kezinde kóterilgen máseleler men usynystar jan-jaqty qarastyrylyp, eskeriletin bolady.
