Tamara Dúısenova: Astanaǵa Elbasynyń esimin berý - qazaqtyń ulylyǵynyń bir kórinisi
Tamara Dúısenova eń aldymen Elbasy - Qazaqstannyń Tuńǵysh Prezıdenti Nursultan Nazarbaevtyń tarıhı sheshimine toqtalyp ótti.
«Biz qazir tarıhı kezeńdi bastan keshirip otyrmyz. El tarıhynda birinshi ret búkil halyq saılaǵan Prezıdent óz ókilettigin erikti túrde toqtatyp otyr. Árıne barlyq qazaqstandyqtar sııaqty men úshin de bul kútpegen oqıǵa boldy. Elbasynyń halyqqa úndeýin estı otyryp, aldyńǵy atqarylǵan jumystardy eske túsirip, kózime jas aldym», - dedi Tamara Dúısenova.
Óz sózinde «Nur Otan» partııasynyń Hatshysy Elbasynyń eren eńbeginiń arqasynda táýelsiz Qazaqstannyń búkil álem tanyǵan memleketke aınalǵanyna da nazar aýdardy.
«Egemendiktiń alǵashqy jyldarynda, naqty aıtsaq 1995 jyly memlekettik qyzmetkerlerdi Japonııaǵa oqýǵa jiberdi. Sol kezde Tokıo ýnıversıtetiniń professory Qazaqstan týraly bilmeı, bizden suraǵan edi. Arada on jyl ótkennen keıin Qazaqstanǵa Japonııa memleketiniń premer-mınıstri Abe myrza kelip, Japonııanyń Qazaqstandy aıryqsha qurmet tutatynyn jetkizdi. Sondaı-aq ol Qazaqstan men Japonııa áleýmettik-ekonomıkalyq bastamalardy birlesip júzege asyratyn terezesi teń strategııalyq áriptester ekenin de aıtty. Bul bizdiń elimiz ben Elbasymyzǵa berilgen laıyqty baǵa», - dedi Tamara hanym.
Al Astana ataýyn ózgertý máselesi týraly pikirinde ol frantsýzdyń ataqty jazýshysynyń sózin mysalǵa keltirdi.
«Vıktor Gıýgonyń «Halyqtyń ulylyǵy tek qana eńbeginde, mádenıetinde nemese kúresinde emes. Sonymen birge, ol halyqtyń ulylyǵyn dáleldegen, sony búkil dúnıege pash etken perzentterin tanı bilýinde, solardy qurmet tutýynda» degen sózi bar. Sondyqtan Astana qalasyna Tuńǵysh Prezıdentimiz Nursultan Ábishuly Nazarbaevtyń esimin berý qazaq halqynyń ulylyǵynyń bir kórinisi dep bilemin jáne osy bastamany qoldaımyn», - dedi Tamara Dúısenova.
