Tamara Dúısenova aqtóbelikterge «e-Ótinish» aqparat júıesiniń artyqshylyǵyn túsindirdi
Jıynǵa aýmaqtyq jáne jergilikti atqarýshy organdardyń basshylary, sonymen qatar, aýdandar men aýyldyq okrýgterdiń ákimderi beıne baılanys arqyly qatysty.
Oblys ákimi Ońdasyn Orazalın Memleket basshysynyń Joldaýynda aıtylǵan azamattardyń ótinishin jedel ári tıimdi qaraýǵa arnalǵan «Halyq únine qulaq asatyn memleket» tujyrymdamasyn júzege asyrýdyń mańyzyn atap ótti.
«Tujyrymdamany júzege asyrý aıasynda Aqtóbe oblysynda jergilikti atqarýshy organdar 2,5 myńdaı qyzmetkerge «e-Ótinish» aqparattyq júıesiniń jumysyn úıretti. Halyqqa qolaıly jaǵdaı jasaý maqsatynda oblysta 16 front-keńse jumysyn bastady»,- dedi Ońdasyn Orazalın.
QR Prezıdenti kómekshisi – QR Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi Tamara Dúısenova QR jańa ákimshilik rásimdik-protsestik kodeksi jaıynda jan-jaqty aıtyp berdi.
«Jańa kodeks – Memleket basshysynyń halyqqa Joldaýynda aıtqan «Halyq únine qulaq asatyn memleket» tujyrymdamasynyń bazalyq normatıvti qujaty. Ákimshilik rásimdik-protsestik kodeks memlekettik organdardyń ótinish berýshilermen jumys paradıgmasyn túbegeıli aýystyrýdy kózdeıdi. Atap aıtqanda, ótinish berýshi óz ótinishiniń qaralý barysyn «e-Ótinish» biryńǵaı aqparattyq júıesi arqyly qarap otyrý múmkindigine ıe bolady. Sonymen qatar, ol dálelderdi usynyp, olardyń zerttelýine qatysady, sonyń ishinde túsindirip, qajet qujattardy kórsete alady»,- dedi Tamara Dúısenova.
Jumys toby osy taqyryp boıynsha Aqtóbe qalasy ákimdiginiń qurylymdyq bólimsheleriniń basshylarymen de kezdesti.
Budan ózge «Nur Otan» partııasynyń oblystyq fılıalynyń ǵımaratynda qoǵamdyq uıym ókilderimen kezdesý ótti.
Sondaı-aq, jumys toby Q.Jubanov atyndaǵy AÓMÝ-de bolyp, stýdentterge qyzmet kórsetý ortalyǵyn qarady.
Kúnniń ekinshi jartysynda QR Prezıdenti kómekshisi - Qazaqstan Respýblıkasy Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi Tamara Dúısenova bastaǵan jumys toby Qarǵaly aýdanyna baryp, Petropavl, Badamsha aýyldarynda aýyldyq okrýg ákimderimen jáne turǵyndarmen kezdesti.
Budan ózge, jumys tobynyń músheleri eki aýyldaǵy «e-Ótinish» aqparat júıesi jáne Petropavl jáne Qosestek aýyldaryndaǵy «Servıstik ákimdiktiń» jumysymen tanysty.
