Tamaqtaný ǵylymynyń damýyna úles qosqan ǵalymdar marapattaldy
Tamaqtaný ǵylymynyń damýyna zor úles qosqan bıohımııa, fızıologııa jáne tamaqtaný gıgıenasy salasyndaǵy tanymal ǵalym, medıtsına ǵylymdarynyń doktory, RǴA akademıgi Vıktor Týtelıan, Qazaqstan dárigerleri men azamattaryna barlyq mańyzdy zertteýlerden habardar bolýǵa kómektesetin ǵalymdardyń, dárigerler men quqyq qorǵaýshylardyń – Medsupport.kz jobasynyń negizin qalaýshylar: dárigerler men patsıentterdiń quqyqtaryn qorǵaý jónindegi zańger Aqmaral Tursynova, medıtsına doktory, bıolog, densaýlyq saqtaý salasyndaǵy kommýnıkator Botagóz Káýkenova, bıolog Dınara Óskenbaeva, hımık Tomırıs Mýlıkova atalǵan syılyqqa ıe boldy.
Syılyq ıegerlerin Tóregeldi Sharmanov negizin qalaǵan qamqorshylar keńesi anyqtady. Keńes quramynda qoǵam qaıratkerleri Oljas Súleımenov, Murat Áýezov, KSRO Halyq ártisi Asanáli Áshimov, Parlament Senatynyń eks-depýtaty Qýanysh Sultanov, áıgili neırohırýrg Serik Aqsholaqov, kardıohırýrg ıÝrıı Pıa bar.
«Saltanatty shara barysynda 2021 jylǵy syılyqtyń alǵashqy laýreattary anyqtaldy. Olar – alǵashqy medıtsınalyq-sanıtarlyq kómekti damytýǵa yqpal etken álemniń jetekshi ǵalymdary. Laýreattar qatarynda Djons Hopkıns ýnıversıtetiniń sheteldik mamandary Devıd Bıshaı, Maıka Shlaıf, qazaqstandyq dárigerler Baqyt Kósherova, Amangúl Dúısenova, COVID-19 emdeý hattamasyn ázirleýshiler bar. Olar koronavırýs ınfektsııasy bar kúrdeli jáne aýyr naýqastarǵa konsýltatsııalyq-dıagnostıkalyq kómek kórsetedi», - dep málim etti S. Asfendııarov atyndaǵy Qazaq ulttyq medıtsına ýnıversıtetiniń baspasóz qyzmetinen.
Aıta ketsek, Tóregeldi Sharmanovtyń halyqaralyq qory 2021 jyly qurylǵan.
«Qordyń mıssııasy – densaýlyq saqtaý jáne salaýatty tamaqtaný salasyndaǵy jas jáne perspektıvaly ǵalymdardyń jobalaryn qoldaý. Qordyń negizin qalaýshy jáne quryltaıshysy – Tóregeldi Sharmanov. Ol búkil ómirin qoǵamǵa, adamzatqa qyzmet etýge, densaýlyq pen tamaqtanýdy jaqsartýǵa arnady. Akademıktiń ómirlik ustanymy – adamdarǵa kómektesý, basqalarǵa paıdaly bolý», - delinedi habarlamada.
Foto: news.kaznmu.edu.kz
