Tamaq qaýipsizdigin baqylaý bir organǵa tapsyryla ma - Saǵyntaevtyń jaýaby
ASTANA. QazAqparat - Úkimettiń búgingi otyrysynda tamaq ónimderiniń qaýipsizdigin baqylaý mindetin naqty bir memlekettik organǵa tapsyrý máselesi qaraldy. Qazirgi kezde atalǵan sharalarmen birneshe mekeme aınalysady. Sonyń ishinde aýyl sharýashylyǵy mınıstriligi, densaýlyq saqtaý mınıstrligi, ınvestıtsııalar jáne damý mınıstrligi bar, dep xabarlaıdy QazAqparat tilshisi.
Úkimet basshysy Baqytjan Saǵyntaevtyń aıtýynsha, tamaq ónimderiniń qaýipsizdigin qadaǵalaý mindetin bir organǵa tapsyrý máselesin áli de zerdeleý kerek. Sebebi bárin bir mınıstrlikke tapsyrylǵan kúnniń ózinde osy saladaǵy jaǵdaı birden túzelip ketpeıdi.
«Baqylaý sharalaryn bir organnan ekinshige tapsyrǵannan keıin jaǵdaıymyz ózgeredi dep aıta almaımyn. Qazirgi sharalardy tolyqqandy iske asyrýǵa ne kedergi? Aldymen osyny anyqtaýymyz qajet. Nege baqylaý durys júrgizilmeıdi? Bir nárseni jetildiremiz be, joq, álde, ózimiz durys jumys jasap jatqan joqpyz ba, osyny zerdelep shyǵý kerek», - dep atap kórsetti B.Saǵyntaev.
Úkimet basshysynyń aıtýynsha, baqylaý sharalaryn bir memlekettik organǵa tapsyrý jaǵyn da jan-jaqty qarastyrý qajet.
«Odan naqty nátıje shyǵa ma? Baqylaý sharalary kúsheıip, odan bıznes qınalyp ketpeı me? Osy jaǵyn da eskerý kerek. Baqylaý fýnktsııasyn bir organnan ekinshige bere salǵan jeńil ǵoı», - dep atap aıtty B.Saǵyntaev.
Aıta keteıik, búgingi otyrysta tamaq ónimderiniń qaýipsizdigin baqylaý salasynda biryńǵaı organdy belgileý máselesi qaraldy. Aýyl sharýashylyǵy mınıstrligi atalǵan mindetti tolyǵymen ózine júkteýdi surap otyr. Al Premer-Mınıstr Baqytjan Saǵyntaev tárkilengen taýarlardyń joıylatynyna kúdiktendi.
