Tamaǵyna jańqa turyp qalǵan qyzdyń otbasy sotqa júgindi - Qostanaı
QOSTANAI. QazAqparat - Qostanaıda 14 jastaǵy oqýshynyń tamaǵyna aǵash jańqasy turyp qaldy. Bógde zat otanyń kómegimen alyndy. Bul týraly agenttik tilshisine qyzdyń anasy Natalıa Masalskaıa habarlady.
«Qyzym sabaǵynan kelip, tústenbek boldy. Ol maǵan qońyraý shalyp, nan jegen soń óziniń jaısyz sezingenin jetkizdi. Men sý ishýge keńes berdim. Kelesi kúni qyzymdy ertip dárigerge bardyq. Lor-dáriger eshqandaı aýytqý baıqalmaǵanyn aıtyp, ıngalıpt jazyp berdi. Qyzym úsh kún boıy qınalyp shyqty. Tipti, tamaq ishýge zaýqy soqpaı, sóıleýge shamasy kelmedi. Ony taǵy bir márte oblystyq balalar aýrýhanasyna apardym. Dárigerler arnaıy qurylǵymen tekseris júrgizip, nátıjesinde qyzdyń tamaǵyndaǵy jańqa baryn anyqtady. 2,3 sm 3 mm kólemdi aǵash jańqasyn otanyń kómegimen keńirdeginen alyp shyqty», - dedi Natalıa Masalskaıa.
Qazir oqýshynyń jaǵdaıy jaqsy. Degenmen, otadan soń ońalý kezeńi uzaq júrgen.
Osy oqıǵadan soń Natalıa Masalskaıa ádildik izdep, nan satyp alynǵan naýbaıhanany sotqa berdi.
«Bastapqyda sotqa barý týraly oılaǵan da emespin. Naýbaıhana dırektorynyń orynbasary keshirim surap keldi. Dırektordyń ózi eńbek demalysynda júripti. Men ony birneshe kún kúttim. Qyzymnan keshirim suraýy kerek edi. Naýbaıhana tarapynan habar bolmaǵan soń sotqa shaǵymdanýǵa týra keldi», - deıdi oqýshynyń anasy.
Buǵan deıin SES jańqa shyqqan nan óndirýshi mekemege tekseris júrgizip, zańbuzýshylyqty tirkegen.
Endi japa shekken oqýshy qyzdyń otbasy naýbaıhanadan 300 myń teńge moraldyq shyǵyn ótetpek.
