Tamaǵyna pyshaq taqady: Elordada jas jigit dárihanany tonady

NUR-SULTAN. QazAqparat – Elordada 26 jastaǵy jigit dárihana satýshysynyń tamaǵyna pyshaq taqap qorqytyp, kassadaǵy aqshany alyp ketken, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.

S aǵat 22:30-da 102 nómirine qaraqshylyq shabýyl jóninde habarlama kelip túsken. Telefon shalǵan áıel B.Momyshuly dańǵylyndaǵy dárihanada belgisiz bireýdiń pyshaqpen qorqytyp, kassadan 30 myń teńgeni tartyp alǵanyn aıtty.

Kúdiktini ustaýǵa polıtsııanyń jeke quramy jumyldyryldy.

«Tergeý barysynda keshki saǵat onnyń shamasynda dárihanaǵa maska taǵyp alǵan belgisiz er adamnyń kirip, dári suraǵany anyqtaldy. 23 jastaǵy farmatsevt sóreden dári alýǵa bara jatqanynda, er adam artynan júgirip kelip, tamaǵyna pyshaq taqap, kassadaǵy aqshany berýin talap etken. Aqshany qolǵa alǵan soń, qashyp ketken», delingen habarlamada.

Jedel qyzmetkerler dárihana jaqtan júgirip ótken jigit kózine ilikken kýágerlerdi tapty. Beınebaqylaý kameralarynyń kómegimen kúdiktiniń jasyrynǵan tusy anyqtaldy. Polıtseıler barlyq jataqhana, hostel, avtoservıs jáne ózge oryndardy tekserdi. Kompıýter klýbynyń birin tekserý kezinde kúdiktige uqsas 26 jastaǵy jigit ustaldy. Odan pyshaq pen aqsha tabylǵan. Er adam kinásin moıyndady.

Atalǵan fakti boıynsha qylmystyq is qozǵaldy. Kúdikti ýaqytsha ustaý oqshaýlaǵyshyna qamaldy.

23-29 tamyz kúnderi aralyǵynda elorda aýmaǵynda «Quqyq tártibi» jedel-aldyn alý sharasy ótip jatyr. Sh aranyń bir kúninde elorda aýmaǵynda 25 qylmys ashyldy, sonyń ishinde 18-i sol kúni ashylǵan. Sondaı-aq buryn jasalǵan 12 qylmys ashyldy, izdeýde bolǵan 4 qylmysker ustaldy. Іshki ister organdarynyń profılaktıkalyq esebinde turǵan 480 tulǵa tekserilgen.