Beıjińde ótken Jahandyq áıelder sammıtine qazaqstandyq delegatsııa qatysty - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Álem chempıony atanǵan ózbekstandyq qazaq Aıtjannyń eńbegi erekshe atap ótildi – ÓzA
Ózbekstan Ulttyq Olımpıada komıtetinde saltanatty marapattaý rásimi ótti. Onda Horvatııanyń Zagreb qalasynda sporttyq kúres túrlerinen ótken eresekter arasyndaǵy álem chempıonatynda el namysyn abyroımen qorǵap, 1 altyn, 1 kúmis jáne 3 qola medal jeńip alǵan úzdik sportshylar qurmetke bólendi.
Bul týraly osy aptada «ÓzA» aqparat agenttigi habarlady.
Habarlamada aıtylýynsha, is-shara barysynda 24 jyldyq úzilisten keıin grek-rım kúresi boıynsha Ózbekstan quramasyna álem chempıonatynda altyn medal syılaǵan etnıkalyq qazaq balýan Aıtjan Qalmahanovtyń eńbegi erekshe atap ótildi. Oǵan BYD markaly avtokólik pen 15 myń AQSh dollary kólemindegi aqshalaı syıaqy tabystalǵan.
Sonymen qatar álemniń úzdik balýandarymen ótken kúrdeli básekelerde qola medal enshilegen Abdýllo Alıev, Ýmıdjon Jalolov jáne Ǵýlomjon Abdýllaevqa 3 750 AQSh dollary kóleminde aqshalaı syıaqy berilgen.
Sondaı-aq osy aptada «ÓzA»-da «Samarqand qalasynda TMD arnaıy qyzmetteri basshylarynyń májilisi ótedi» degen taqyryptaǵy aqparat jaryq kórdi. Atalǵan basylymnyń málimetinshe, bıyl 16–17 qazan kúnderi Samarqand qalasynda TMD-ǵa múshe elderdiń qaýipsizdik organdary men arnaıy qyzmetteri basshylary keńesiniń 57-májilisi, sondaı-aq TMD-ǵa múshe memleketterdiń barlaý jáne qaýipsizdik qyzmetteri basshylarynyń 21-májilisi ótýi josparlanǵan.
Bul basqosýǵa Ázerbaıjan, Armenııa, Belarýs, Qazaqstan, Qyrǵyzstan, Reseı, Tájikstan, Ózbekstan jáne Túrkimenstannyń arnaıy qyzmet basshylary qatysady.
Sonymen qatar jıynǵa TMD Atqarý komıtetiniń jáne TMD-ǵa múshe memleketterdiń Terrorızmge qarsy ortalyǵynyń ókilderi de qatysady.
Beıjińde ótken Jahandyq áıelder sammıtine qazaqstandyq delegatsııa qatysty – «Halyq gazeti»
Beıjińde 13-14 qazan aralyǵynda Jahandyq áıelder sammıti ótti. Álemniń túkpir-túkpirinen kelgen qonaqtar Beıjińdegi áıelder taqyryby boıynsha mańyzy zor, yqpaly keń sharaǵa jınaldy. Qazaqstan delegatsııasyn bastap kelgen Qazaqstan Respýblıkasynyń Konstıtýtsııalyq Sotynyń Tóraǵasy Elvıra Ábilhasymqyzy Azımova onlaın «Halyq Gazetine» suhbat berdi. E. Azımova suhbatynda sammıttiń óte joǵary deńgeıde ótkenin aıtyp, «Beıjiń deklaratsııasynyń» qabyldanǵanyna 30 jyl tolýyna oraı Jahandyq áıelder isiniń damýy men bolashaǵy týraly óziniń pikirimen bólisti, dep jazady «Halyq gazeti».
Qytaılyq BAQ-tyń málimetinshe, Elvıra Azımova Qytaıdyń áıelder men balalardyń quqyqtaryna baılanysty «maqsatqa jetý úshin eń bastysy berik ıdeologııa men aıqyn saıasat bolý kerek» degen ustanymyn óte oryndy dep sanaıtynyn aıtqan.
Bıyl Beıjińde ótken Birikken Ulttar Uıymynyń tórtinshi Jahandyq áıelder sammıtiniń ashylǵanyna, «Beıjiń deklaratsııasy» men «Іs-qımyl josparynyń» qabyldanǵanyna 30 jyl toldy.
Elvıra Azımovanyń pikirinshe, búgingi sammıtte taraptardyń barlyǵy «Beıjiń deklaratsııasynyń» qazirgi tańda da álemde erekshe qyzyǵýshylyq týdyratynyn jetkizdi. «Beıjiń deklaratsııasynyń» maqsattaryna jetý úshin jumysty toqtatpaýymyz kerek. «Bárimiz turaqty damýǵa jetýde taraptar saıası jaǵynan ǵana emes, quqyqtyq turǵydan da qamtamasyz etilýi kerek degen ortaq pikirge keldik» deıdi ol.
QR Konstıtýtsııalyq Sotynyń Tóraǵasynyń aıtýynsha, 30 jyl buryn tek áıelder quqyǵy ǵana aıtylatyn bolsa, búgingi sammıtte, áıelder men erler qatar damý kerektigi ortaǵa salynǵan. Sondaı-aq ol áıel men er qol ustasyp birge damyǵanda ǵana, biz alǵa qoıǵan maqsatqa jetemiz degen.
Sonymen qatar osy aptada «Halyq gazeti» basylymynda «Hýnanda keri qaıtqan Qytaı-Eýropa poıyzdary Ortalyq Azııa astyqtaryn turaqty ákele bastady» degen aqparat jaryq kórdi.
Atalǵan BAQ-tyń dereginshe, 15 qazanda Qazaqstannyń bıdaı, arpa jáne basqa da astyq ónimderi tıelgen halyqaralyq poıyz Chanshaǵa keldi. Bul Qytaı-Eýropa poıyzynyń keri poıyzy «Qazaqstan-Qorǵas/Alashankoý-Chansha» baǵyty boıynsha Ortalyq Azııa astyqtaryn alyp qaıtýdy turaqty iske qosqanyn bildiredi. Ol Qytaıdyń ortalyq aımaǵyndaǵy azyq-túlikpen qamtamasyz etý kepildigine tıimdi jáne turaqty halyqaralyq logıstıkalyq arnany qosty.
Tasymaldaýdyń ýaqyty – poıyz qazaqstandyq zaýyttan shyǵyp, Qorǵas nemese Alashankoý porttary arqyly elge kiredi. Tasymaldaý ýaqyty shamamen 15 kún.
Qasym-Jomart Toqaev sammıt yntymaqtastyqtyń jańa kezeńine jol ashatynyna senim bildirdi - ParsToday
Qasym-Jomart Toqaev Dýshanbe sammıtiniń qorytyndylary óńirlik yntymaqtastyqtyń jańa kezeńine jol ashatynyna senim bildirdi. Bul týraly ParsToday aqparat agenttigi Aqordanyń baspasóz qyzmetine silteme jasap habarlady.
Keltirilgen derekterge súıensek, Memleket basshysy Aýǵanstandaǵy ahýal óńirlik qaýipsizdikti nyǵaıtýdyń ajyramas bóligi bolyp qala beretinin atap ótti. Prezıdent bul eldi óńirdegi ekonomıkalyq úderiske tartý boıynsha úılestirilgen jumysty jalǵastyrý qajettigin jetkizdi.
Aıta keteıik, Qasym-Jomart Toqaev Dýshanbe sammıtiniń qorytyndylary Reseı men Ortalyq Azııa elderiniń turaqtylyǵy men órkendeýi jolynda óńirlik yntymaqtastyqtyń jańa kezeńine jol ashatynyna senim bildirdi.
Jasandy ıntellektini qoldanatyndar sany 515 mıllıon adamǵa jetti - CNR
18 qazan kúni Qytaı ınternet jáne ınformatsııa ortalyǵy 2025 jylǵy (6-kezekti) Qytaı ınternet baılyǵy jınalysynda «Jasandy ıntellektini qoldanatyndardy qoldaýdy damytý baıandamasyn (2025)» jarııalady. Málimette kórsetilýinshe, 2025 jyly maýsym aıyna deıin Qytaı elinde jasandy ıntellektini qoldanatyndar sany 515 mıllıon adamǵa jetken, dep habarlaıdy Qytaıdyń «Ortalyq halyq radıosy».
Atalǵan basylymnyń dereginshe, bul kórsetkish 2024 jyly jeltoqsan aıyndaǵydan 266 mıllıon adam artyp, qoldanýshylar sany jarty jylda eselep artqan. Atap aıtqanda jalpy mólsheri 36.5%-dy quraǵan.
«Taltús» romany túrik tilinde jaryq kórdi - TRT
Qazaq mádenıetiniń birtýar tulǵasy, teńdesi joq óner qaıratkeri, qalamger-oıshyl Talasbek Ásemqulovtyń shyǵarmasy túrik oqyrmandarmen tabysty.
Ankaradaǵy Adnan Ótúken atyndaǵy kitaphanada Qazaqstannyń kórnekti jazýshylarynyń biri, kúıshi jáne mýzykatanýshy Talasbek Ásemqulovtyń ómirbaıandyq shyǵarmasy «Taltús» romanynyń tusaýkeseri ótti. Sharany Kóktý qazaq mádenıeti qoǵamy uıymdastyrǵan.
Bul týraly osy aptada Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, roman qazaq halqynyń rýhyn, tarıhyn, mýzykasyn baıandaýymen erekshelenedi.
Kitapty jazýshynyń serigi, ári mádenıet tanýshy, ǵalym, jazýshy Zıra Naýryzbaı tanystyrǵan.
Sharada Talasbek Ásemqulovtyń tek jazýshy ǵana emes, jan-jaqty zııaly, kúıshi, dombyra sheberi, kompozıtor, kınodramatýrg, synshy, ónertanýshy, zertteýshi, kásibı aýdarmashy ekeni basa aıtyldy.
Sondaı-aq osy aptada «TRT»-da «Arǵyqazaq mıfologııasy» túrik tiline aýdaryldy» degen taqyryptaǵa aqparat jarııalanǵan bolatyn.
Túrkııalyq basylymnyń málimetinshe, qazaqtyń uly perzenti, áıgili ǵalym, mıfolog Serikbol Qondybaıdyń «Arǵyqazaq mıfologııasy» atty túrik tiline aýdarylǵan kitabynyń tusaýkeser rásimi bolyp ótti.
Qazaqstannyń kórnekti ǵalymy, etnograf jáne mıfolog Serikbol Qondybaıdyń «Arǵyqazaq mıfologııasy» atty eńbeginiń tanystyrylymy Túrkııa Prezıdenttik Ult kitaphanasynda ótti. Túrki mádenıetiniń halyqaralyq uıymy Túriksoı muryndyq bolǵan is-shara barysynda ǵalymnyń eńbekteriniń túrki áleminiń rýhanı tamyryn zertteýdegi mańyzy men qazaq mıfologııasynyń biregeı erekshelikteri keńinen sóz boldy.
Tusaýkeserge Qazaqstan Respýblıkasynyń Túrkııadaǵy Tótenshe jáne Ókiletti Elshisi Erkebulan Sápıev, Mańǵystaý oblysy ákiminiń orynbasary Tilegen Ábishev, Aqtaý qalasynyń ákimi Ábilqaıyr Baıpaqov, Mańǵystaý oblystyq mádenıet, tilderdi damytý jáne arhıv isi basqarmasynyń basshysy Nurtas Salı, Túriksoı Bas hatshysy Sultan Raev jáne Bas hatshynyń orynbasary Saıt ıÝsýf, sonymen birge túrik ǵalymdar, mádenıet qaıratkerleri, qazaq jáne túrik stýdentter men BAQ ókilderi qatysty.
Sonymen qatar «TRT» basylymynda «Mańǵystaý oblysy Túriksoı uıymyna kıiz úı tartý etti» degen taqyryptaǵy aqparat jaryq kórdi.
Halyqaralyq Túrki mádenıeti uıymy (Túriksoı) «Aqtaý–2025 Túrki áleminiń mádenı astanasy» baǵdarlamasy aıasynda aýqymdy mádenı is-sharaǵa uıytqy bolǵan.
Atalǵan is-sharalar sheńberinde «Kaspııdiń injý-marjany – Qazaq kıiz úıiniń» saltanatty betashary ótkizildi.
Jeti qanat aǵash úıdiń(kıiz úıdiń – avt.) ashylý saltanatyna Qazaqstan Respýblıkasynyń Túrkııadaǵy Tótenshe jáne Ókiletti Elshisi Erkebulan Sápıev, Mańǵystaý oblysy ákiminiń orynbasary Tilegen Ábishev, Aqtaý qalasynyń ákimi Ábilqaıyr Baıpaqov, Mańǵystaý oblystyq mádenıet, tilderdi damytý jáne arhıv isi basqarmasynyń basshysy Nurtas Salı, Túriksoı Bas hatshysy Sultan Raev jáne Bas hatshynyń orynbasary Saıt ıÝsýf qatysty. Іs-sharaǵa sondaı-aq Túrkııa Respýblıkasy Mádenıet jáne týrızm mınıstriniń orynbasary doktor Serdar Cham, Ádilet jáne damý partııasy tóraǵasynyń orynbasary, professor Kúrshat Zorlý jáne Ankara gýbernatory Vasıp Shahın jáne basqa da kóptegen qonaq keldi. Tarıhı kúnge teń osy betashardan Qyrǵyzstan, Ózbekstan jáne Ázerbaıjan syndy túrki elderiniń Túrkııadaǵy ókiletti elshileri de qalys qalmady.
Saltanatty sharanyń betasharynda Túriksoı Bas hatshysy Sultan Raev 2025 jyly Aqtaýda júzdegen myń adamdy qabyldaǵan is-sharalarǵa toqtalǵan.