Talsýatta 201 úı gazdan ýaqytsha ajyratyldy
QYZYLORDA. QazAqparat - Qyzylorda qalasyna qarasty Talsýat eldi mekeni turǵyndary dál qazirgi ýaqytta gazsyz otyr. Oǵan shkaftyq gaz rettegish pýnktiniń aldyndaǵy qubyrlar qosylǵan jerden gaz shyqqany sebep boldy, dep habarlaıdy QazAqparat tilshisi.
Óńirlik kommýnıkatsııalar qyzmetiniń habarlaýynsha, ústimizdegi jyldyń 18 mamyry kúni saǵat 23-00-der shamasynda «QazTransGazAımaq» avarııalyq jedel-qutqarý qyzmetine Talsýat eldi mekeni turǵyndarynan habarlama kep túsken. Tekserý nátıjesinde shkaftyq gaz rettegish pýnktiniń aldyndaǵy qubyrlar qosylǵan jerden gaz shyqqany anyqtalǵan.
«Jedel jetken arnaıy top sol sátte AGRS-1-diń T-1 qubyryn japty. Búginde Talsýat ońaltý ortalyǵy men 201 turǵyn úı kógildir otynnan ajyratyldy. Tańerteńnen bastap «QazTransGazAımaq» jumysshylary qaıta qalpyna keltirý jumystaryn jasap jatyr», - dedi oblystyq energetıka jáne turǵyn úı, kommýnaldyq sharýashylyq basqarmasynyń bólim basshysy Oljas Ismavaev.
Mamandar gazdyń berilý ýaqyty qosymsha habarlanatynyn jetkizdi.
Ádiljan Úmbet
