TALSIM jáne Tasqyn júıeleri sý tasqyny táýekelderin basqarýǵa kómektesedi
ASTANA.KAZINFORM — Germanııanyń TALSIM júıesi men Nıderlandtyń Delft-FEWS platformasy negizinde qurylǵan model Qazaqstandaǵy sý qoımalaryna keletin sý kólemin boljaýǵa múmkindik beredi. Bul týraly Sý resýrstary jáne ırrıgatsııa vıtse-mınıstri Aslan Abdraımov Ortalyq kommýnıkatsııalar qyzmetinde ótken brıfıngte málimdedi.
Vıtse-mınıstrdiń aıtýynsha, qazirgi jaǵdaıda sý resýrstaryn tıimdi basqarý úshin naqty derekter, ýaqtyly boljamdar, ashyq esep júrgizý jáne zamanaýı tsıfrlyq quraldar qajet. Bul rette sý resýrstaryn boljaý máselesi erekshe mańyzǵa ıe.
— Búginde tek qazirgi jaǵdaıdy tirkep qana qoımaı, aldaǵy aılarda, sý tasqyny kezeńinde nemese sý az bolatyn ýaqytta gıdrologııalyq ahýaldyń qalaı qalyptasatynyn aldyn ala boljaý mańyzdy. Osy baǵytta mınıstrlik BUU-nyń Damý baǵdarlamasymen birlesip, Germanııanyń TALSIM júıesin beıimdeý jumystaryn júrgizdi. Bul júıe bizde Nıderlandtyń Delft-FEWS platformasymen birge jumys isteıdi jáne Qazaqstan jaǵdaıyna ıkemdelgen. Júıe sý qoımalaryna keletin sý kólemin boljaýǵa múmkindik beredi. Sonymen qatar Qazgıdromettiń gıdrologııalyq beketterinen alynatyn derekter belsendi túrde paıdalanylady. Gıdrobekettermen ıntegratsııanyń arqasynda TALSIM júıesindegi model naqty aqparatty qabyldap, óńdeıdi jáne keıingi taldaý men sheshim qabyldaý úshin boljamdar qalyptastyrady, — dedi Aslan Abdraımov.
Onyń aıtýynsha, qazirgi ýaqytta TALSIM-NG júıesin Jasandy ıntellekt jáne tsıfrlyq damý mınıstrligi ázirlegen Tasqyn júıesimen baılanystyrý jumystary júrgizilip jatyr. TALSIM arqyly qalyptasqan boljamdyq aqparatty Tasqyn júıesine jiberip, ony sý tasqyny qaýpin aldyn ala eskertýge, derekter almasýǵa jáne jedel sheshimder qabyldaýǵa paıdalaný. TALSIM yqtımal sý jaǵdaıyn eseptep, boljaýǵa kómektesse, Tasqyn bul aqparatty eskertý jáne áreket etý júıesinde qoldanýdy qamtamasyz etedi.
— Qazirgi tańda atalǵan modelder Qazaqstannyń segiz iri ózen basseınin qamtıdy. Aldaǵy ýaqytta bul jumysty keńeıtip, eldegi barlyq negizgi ózenderdi qamtý josparlanyp otyr, — dedi ol.
Spıkerdiń sózinshe, TALSIM — jaı ǵana baǵdarlamalyq qamtamasyz etýdi engizý emes, ulttyq gıdrologııalyq modeldeý júıesin qalyptastyrýǵa baǵyttalǵan mańyzdy joba. Oǵan qosa mınıstrlik qar jamylǵysyn monıtorıngteý jáne sý tasqynyn boljaý salasyndaǵy halyqaralyq tájirıbeni zerdelep jatqanyn atap ótti.
Aıta keteıik, Qazaqstanda Sý resýrstarynyń ulttyq aqparattyq júıesi bir aı ishinde iske qosylady.
