Tálipter Tramptyń Bagram áýebazasyn qaıtarý týraly talabyn qabyldamady
ASTANA. KAZINFORM — Talıban qozǵalysy AQSh prezıdenti Donald Tramptyń eskertýin elemeı, Vashıngton Aýǵanstandaǵy 20 jyldyq soǵys kezinde basqarǵan Bagram áýebazasyn qaıtarý jónindegi talabyn qabyldamady. Bul týraly Al Jazeera habarlaıdy.
Talıban jeksenbi kúni jasaǵan málimdemesinde «Aýǵanstannyń táýelsizdigi men aýmaqtyq tutastyǵy eń basty qundylyq» ekenin atap ótip, AQSh-ty kúsh qoldanbaý týraly buǵan deıingi kelisimderdi saqtaýǵa shaqyrdy.
— Bul — sátsizdikke ushyraǵan burynǵy tásilderdi qaıtalaýdyń ornyna, realızm men parasattylyqqa negizdelgen saıasat júrgizý qajettigin taǵy bir márte kórsetedi, — delingen Aýǵanstan úkimetiniń resmı málimdemesinde.
Buǵan deıin Donald Tramp Bagram áýebazasyn qaıtarýǵa qyzyǵýshylyq tanytqanyn aıtqan bolatyn.
— Qazir biz Aýǵanstanmen kelissóz júrgizip jatyrmyz jáne bazany qaıtarǵymyz keledi. Bul múmkindiginshe tez júzege asýy kerek. Eger olar buǵan kelispese, ne bolatynyn ózderińiz kóresizder, — dedi Tramp senbi kúni Aq úıde jýrnalısterge bergen suhbatynda.
Keıinirek AQSh prezıdenti bul týraly óziniń Truth Social áleýmettik jelisindegi paraqshasynda da jazdy.
— Eger Aýǵanstan Bagram áýebazasyn ony salǵan AQSh-qa qaıtarmasa, jaman dúnıeler bolady, — dep jazdy ol.
Bagram — Kabýl qalasynan 50 shaqyrym soltústikte ornalasqan iri áskerı áýe bazasy. Bul nysan AQSh-tyń Talıbanǵa qarsy 20 jyldyq soǵysy kezinde negizgi áskerı ortalyqtardyń biri boldy. 2021 jyly batys áskeri elden ketip, Talıban bılikke kelgennen keıin, bazanyń baqylaýy olardyń qolyna ótti.
Tramp Bagramdy qaıtarý jospary týraly alǵash ret Ulybrıtanııaǵa jasaǵan memlekettik sapary kezinde, eldiń premer-mınıstri Kır Starmermen birlesken baspasóz konferentsııasynda aıtqan bolatyn.
— Biz ony qaıtarýǵa tyrysyp jatyrmyz, óıtkeni olarǵa bizden bir nárse kerek. Bul bazany qaıtarǵymyz keledi. Biraq bazany qaıtarýdyń bir sebebi — ol Qytaı ıadrolyq qarýyn óndiretin orynnan bir saǵattyq jerde ornalasqanyn sizder bilesizder, — dedi AQSh prezıdenti.
Sondaı-aq, ol AQSh bul bazany Talıbanǵa «tek jaı ǵana berip qoıǵanyn» synǵa aldy.
Aýǵanstan Syrtqy ister mınıstrliginiń ókili Zakır Djalalı AQSh-tyń elge qaıtadan áskerı kúshpen oralýyna qarsy shyqty.
— Aýǵan halqy búkil tarıhynda óz jerinde sheteldik áskerı kúshterdiń bolýyna eshqashan kónbegen, — dedi ol.
Sonymen qatar, ol eki eldiń ózara qurmet pen ortaq múdde negizinde ekonomıkalyq jáne saıası qatynastardy damytýy kerek ekenin atap ótti.
Eske salaıyq, buǵan deıin AQSh Prezıdenti Donald Tramp BUU Bas Assambleıasynyń 80-sessııasy aıasynda 20 eldiń kóshbasshysymen kezdesýdi josparlap otyrǵanyn aıtty.