Tálipter Tramptyń Aýǵanstandaǵy Bagram áýe bazasyn qaıtarý týraly talabyn qabyldaǵan joq

ASTANA. KAZINFORM – «Talıban» qozǵalysy AQSh prezıdenti Donald Tramptyń qoqan-loqqysyn elemedi jáne onyń Aýǵanstandaǵy 20 jylǵa sozylǵan soǵys kezinde Vashıngton baqylaýynda bolǵan Bagram áýe bazasyn berý týraly talabyn qabyldaǵan joq, dep habarlaıdy Al Jazeera.

Talıban jeksenbi kúni «Aýǵanstannyń táýelsizdigi men aýmaqtyq tutastyǵy bárinen mańyzdy» dep málimdep, AQSh-ty kúsh qoldanýdan bas tartyp, burynǵy kelisimderdi oryndaýǵa shaqyrdy.

- Sáıkesinshe, bul burynǵy sátsiz tásilderdi qaıtalamaı, shynaıylyq pen parasattylyq saıasatyn júrgizý qajettigin taǵy bir ret kórsetedi, - delingen Aýǵanstan úkimetiniń resmı málimdemesinde.

Tramp jaqynda áýe bazasyn qaıtarýǵa múddeli ekenin bildirdi.

- Qazir biz Aýǵanstanmen kelissóz júrgizip jatyrmyz jáne ony múmkindiginshe tezirek, dereý qaıtarǵymyz keledi. Al eger olar muny jasamasa, men ne isteıtinimdi kóresizder, - dedi Tramp senbi kúni Aq úıde tilshilerge.

AQSh prezıdenti keıinirek TruthSocial áleýmettik jelisinde málimdeme jasady.

- Eger Aýǵanstan Bagram áýe bazasyn ony salǵan AQSh-qa qaıtarmasa, keleńsiz jaǵdaılar bolady, - dep jazdy Aq úı basshysy.

Bagram – Kabýldan soltústikke qaraı 50 shaqyrym jerde ornalasqan úlken áýe bazasy. Ol Talıbanmen eki onjyldyq soǵys kezinde AQSh-tyń negizgi áskerı ortalyqtarynyń biri boldy. Bazany baqylaý 2021 jyly elde qozǵalys bılikke kelip, batys áskerleri shyǵarylǵan kezde tálipter qolyna ótti.

Tramp alǵash ret Ulybrıtanııaǵa memlekettik sapary kezinde Ulybrıtanııa premer-mınıstri Kır Starmermen ótken baspasóz máslıhatynda bazany qaıtarýǵa kúsh salyp júrgenin jarııalady.

- Biz ony qaıtarýǵa tyrysyp jatyrmyz, óıtkeni olar bizden birdeńe alǵysy keledi. Biz bul bazany qaıtarǵymyz keledi. Bul bazany qalaýymyzdyń bir sebebi, ózderińiz biletindeı, bul Qytaı ıadrolyq qarýyn shyǵaratyn jerden bir saǵattyq jerde ornalasqan, - dedi Amerıka basshysy.

Tramp sonymen birge AQSh Bagramdy Talıbanǵa «jaı ǵana» bergenin málimdedi. Aýǵanstannyń resmı tulǵalary AQSh-tyń eldegi qatysýyn qalpyna keltirýge úzildi-kesildi qarsy shyqty.

- Aýǵandyqtar tarıh boıy óz jerinde sheteldik áskerılerdiń bolýyna eshqashan shydamaǵan, - dep málimdedi Aýǵanstan Syrtqy ister mınıstrliginiń baspasóz hatshysy Zakır Djalalı. 

Ol sondaı-aq eki el «eki jaqty qurmet pen ortaq múddege negizdelgen ekonomıkalyq jáne saıası qarym-qatynastardy» damytý qajettigin qosyp ótti.

Buǵan deıin Aýǵanstannyń alty provıntsııasynda ınternet shektelgenin jazǵan bolatynbyz.