Tálipter áıelderdi qamaýǵa ala bastady
ASTANA. KAZINFORM – Aýǵanstandaǵy «Talıban» ýaqytsha úkimeti kıim kııý tártibin buzǵan áıelder men qyzdardy qamaýǵa ala bastaǵan. Bul týraly Euronews habarlady.
BUU-nyń Aýǵanstandaǵy mıssııasy 16-19 shilde aralyǵynda Kabýlda hıdjab nemese ıslamdyq jaýlyq taǵý talaptaryn oryndamaǵan «kóptegen» áıel men qyzdyń qamaýǵa alynǵanyna alańdaýshylyq bildirdi. Alaıda ustalǵandardyń naqty sany, jasy nemese qaıda ustalyp otyrǵany jóninde aqparat berilmedi.
— Bul sharalar áıelder men qyzdardy odan ári oqshaýlap, qoǵamda qorqynysh qalyptastyrýǵa jáne jurtshylyq senimin joıýǵa baǵyttalǵan, — delingen uıym málimdemesinde.
BUU mıssııasy «Talıban» úkimetin áıelder men qyzdardyń adam quqyqtary men negizgi bostandyqtaryn shekteıtin «saıasat pen tájirıbeden», sonyń ishinde 6-synyptan keıin bilim alýǵa tyıym salýdan bas tartýǵa shaqyrdy.
Aıta keteıik, 2022 jyldyń mamyr aıynda «Talıban» áıelderge tek kózi ǵana kórinetin párenje (nıqab) kııý jóninde jarlyq shyǵarǵan. Jarlyqqa saı, áıelder bastan aıaq tumshalanyp júrýi tıis.
2024 jylǵy qańtarda ýaqytsha úkimettiń ar-ojdan jáne ádep mınıstrligi Aýǵanstan astanasynda «hıdjabty durys kımegeni úshin» áıelderdiń qamaýǵa alynǵanyn habarlaǵan bolatyn. Mınıstrliktiń baspasóz hatshysy Abdýl Ǵafar Farýq qansha áıel ustalǵany jóninde aqparat bermegen.
Buǵan deıin Aýǵanstanda tálipter áıelderge radıodan habar taratýǵa tyıym salǵanyn jazdyq.