TalpynHalyq–2025: Mańǵystaýda jastarǵa arnalǵan alǵashqy startap baıqaý qorytyndylandy
AQTAÝ. KAZINFORM — Mańǵystaý oblysynda «TalpynHalyq–2025» atty alǵashqy óńirlik jastar startap baıqaýy aıaqtaldy. Sonymen qatar, pedagogıkalyq kásiptik baǵdar berýshilerge arnalǵan «Kásiptik baǵdar – tabysqa bastar jol» baıqaýynyń da qorytyndysy jarııalandy.
Baıqaýlar Tımýr Qulybaevtyń Halyk qory júzege asyryp otyrǵan «Tálimger» baǵdarlamasy aıasynda ótti. Sondaı-aq bul sharalar Memleket basshysy Qasym-Jomart Toqaevtyń jarııalaýymen ótken «Jumysshy mamandyqtary jyly» tujyrymdamasymen úndes uıymdastyryldy.
Joba belsendi jastardy qoldaýǵa, qoldanbaly kásipkerlik daǵdylaryn damytýǵa, sondaı-aq óńirdegi bilim berý júıesinde kásiptik baǵdardyń rólin kúsheıtýge baǵyttalǵan tıimdi praktıkalyq alańǵa aınaldy.
Ideıadan daıyn jobaǵa deıingi jol
«TalpynHalyq–2025» baıqaýy qazanda bastalyp, Mańǵystaý oblysyndaǵy kolledj stýdentteri tarapynan zor qyzyǵýshylyq týdyrdy. Jalpy 78 ótinim qabyldanyp, irikteý nátıjesinde 45 joba jartylaı fınalǵa ótti, al úzdik 26 komanda fınalda óz startap-ıdeıalaryn usyndy.
Qatysýshylar óńir úshin basym baǵyttar boıynsha jobalar ázirledi: ekologııa, bilim berýge arnalǵan tsıfrlyq sheshimder, ınklıýzıvti qyzmetter, týrızm, áleýmettik kásipkerlik, energııa tıimdiligi jáne «jasyl» tehnologııalar. Fınalda komandalar táýelsiz sarapshylar alqasynyń aldynda jobalaryn qorǵap, bıznes-modelderin, ekonomıkalyq paıdasyn jáne iske asyrý áleýetin tanystyrdy.
Baıqaý qorytyndysy boıynsha jeńimpazdar anyqtaldy. Gran-prı jáne 1 mln teńge kólemindegi júldeni Mańǵystaý óner kolledjiniń stýdentteri ázirlegen, úı jaǵdaıynda damýǵa arnalǵan onlaın-trenajer — «UMiT» jobasy jeńip aldy.
Júldeli oryndarǵa óndiris, tsıfrlyq sheshimder jáne kreatıvti ındýstrııalar baǵytyndaǵy jobalar da ıe boldy.
Sondaı-aq, alty komandaǵa óz ıdeıalaryn ári qaraı damytý men keńeıtýge múmkindik beretin jazǵy bıznes-lagerge joldama tabystaldy.
Kórsetkish emes, tájirıbe kerek
Uıymdastyrýshylar baıqaýdyń basty nátıjesi — tek júldeli oryndardy bólý emes, qatysýshylardyń boıynda naqty kásipkerlik quzyretterdiń qalyptasýyna úles qosý bolǵanyn aıtady. Joba barysynda stýdentter ıdeıadan bastap daıyn startapqa deıingi jol, mentorlyq qoldaý, jobany tanystyrý, qarjymen jumys isteý jáne jumysyn qorǵaý sııaqty barlyq kezeńnen ótti.
«Tálimger» jobasynyń jetekshisi ári Halyk qorynyń bilim berý jobalary jónindegi atqarýshy dırektory Aıgúl Ahmetovanyń aıtýynsha, «TalpynHalyq» — jastardy múmkindikti kórip, óz óńirine qajet sheshim usynýǵa úıretetin tájirıbe mektebi.
Kásiptik baǵdar — júıeli jumys
Pedagogter arasyndaǵy «Kásiptik baǵdar — tabysqa bastar jol» baıqaýyna oblys boıynsha shamamen 50 maman qatysyp, irikteý qorytyndysymen 10 pedagog úzdik dep tanyldy.
Baıqaý úsh baǵyt boıynsha ótti: kásiptik baǵdardyń kreatıvti formattary, tsıfrlyq keńistiktegi kásiptik baǵdar jáne jeke kásibı baǵdarlaýshy.
Jeńimpazdarǵa Halyk qorynyń aqshalaı júldeleri tabystaldy, al 11 pedagog belsendiligi, kásibı sheberligi jáne jastarmen jumystaǵy úlesi úshin jazǵy bıznes-lagerge joldamamen marapattaldy.
Óńirdi damytýdaǵy ekojúıelik tásil
«TalpynHalyq–2025» — Halyk qorynyń Mańǵystaý oblysyndaǵy keń aýqymdy ekojúıelik jumysynyń bir bóligi. 2023 jyldan beri qor óńirdiń damýyna ınfraqurylymdyq jáne áleýmettik jobalardan bastap, bilim, sport jáne ekologııa salalaryna deıin 5 mlrd teńge baǵyttady.
Bul baıqaý bilim men ekonomıkany baılanystyratyn mańyzdy kópirge aınalyp, jastarǵa ıdeıadan — daǵdyǵa, daǵdydan — naqty jobaǵa deıingi joldy júıeli túrde eńserýge kómektesedi. Jastar áleýeti joǵary óńir úshin turaqty damý traektorııasyn qalyptastyryp, jańa ósimdi aıqyndaıdy.
«TalpynHalyq–2025» baıqaýy — adam kapıtalyna salynǵan ınvestıtsııanyń nátıjesi. Jobada jastardyń bastamalary, jańa quzyretteri jáne óz óńiriniń damýyna jaýapkershilik alýǵa daıyndyǵy naqty kórinis tapty.