«Tálimgerler» baǵdarlamasyna 10 jyl: Qazaqstanda alǵashqy respýblıkalyq forým ótti
ASTANA. KAZINFORM — Almatyda ata-anasynyń qamqorlyǵynsyz qalǵan jáne jetim balalarǵa arnalǵan tálimgerlik taqyrybyndaǵy alǵashqy respýblıkalyq forým ótti, dep habarlaıdy «Dara» qaıyrymdylyq qorynyń baspasóz qyzmeti.
«Nastavnıkı — Tálimgerler»: Qazaqstan Respýblıkasynda 10 jyl» atty forým balalar úıleriniń tárbıelenýshilerin áleýmettendirýdiń tıimdi quraly retinde tálimgerlikti damytý men qoldaýdy talqylaý úshin memlekettik organdardyń, bıznestiń, ÚEU men halyqaralyq uıymdardyń ókilderin biriktirdi.
Forýmǵa QR Parlamenti Májilisiniń Áleýmettik-mádenı damý komıtetiniń tóraǵasy Ashat Aımaǵambetov; QR Oqý aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova; QR Bala quqyqtary jónindegi ýákil Dınara Zákıeva; Islam Damý Bankin qosa alǵanda, bıznes jáne halyqaralyq uıymdardyń ókilderi qatysty.
Іs-shara «Dara» qaıyrymdylyq qorynyń «Tálimgerler» baǵdarlamasynyń 10 jyldyǵyna oraılastyryldy. Tálimger — bul balalar úıindegi jasóspirimmen tájirıbe bólisetin, oǵan eresek ómir súrý daǵdylaryn ıgerýge kómektesetin, qıyn sátterde qoldaý kórsetetin jáne bolashaqty tańdaýda kómektesetin eresek adam. Tálimger bolý úshin Qazaqstan azamaty arnaıy oqýdan ótip, belgili bir talaptarǵa saı bolýy kerek.
— Qazaqstanda tálimgerlik ınstıtýtynyń damýy memlekettiń, úkimettik emes uıymdardyń jáne belsendi azamattardyń kúsh-jigerin biriktirý arqasynda múmkin boldy. Tálimgerlik ınstıtýtyn bekitý úshin aýqymdy jumys atqaryldy: Bala quqyqtary týraly zańǵa ózgerister engizildi, birneshe normatıvtik-quqyqtyq aktiler qabyldandy. Bul is-shara jaı ǵana shara emes — ol tálimgerlik ınstıtýtynyń jańa deńgeıge kóterilgenin, qoǵamda moıyndalyp, durys túsinile bastaǵanyn kórsetedi. Búgin jınalǵan adamdar jaqsy biledi: balanyń ómirinde eń mańyzdysy — janashyrlyqpen janynda bolatyn eresek adam. Dál osy qamqorlyq pen qoldaý balaǵa ómir boıy arqa súıeıtin negiz bola alady, — dedi Balalardy qorǵaý jónindegi komıtettiń tóraıymy Nasymjan Ospanova.
«Dara» qory 2015 jyldan beri júzege asyryp kele jatqan «Tálimgerler» baǵdarlamasy balalar úıiniń tárbıelenýshilerin tálimgerlerimen qaýyshtyryp, sol arqyly balalardy qoldaý men áleýmettendirýdi kózdeıdi. Búginde baǵdarlama Qazaqstannyń 18 qalasynda jumys istep, 360-tan astam jasóspirimge derbes ómirge qadam basýǵa kómektesti. Baǵdarlamanyń aýqymy jyl saıyn keńeıip, qatysýshylar sany artyp keledi.
Baǵdarlama alǵash ret Astana, Almaty jáne Qaraǵandy qalalarynda iske qosyldy. Sol kezde Qaraǵandy oblysy Bilim basqarmasynyń basshysy bolǵan Ashat Aımaǵambetov uzaq jylǵy jumystyń nátıjeleri men tálimgerlikti zańnamalyq deńgeıde bekitý mańyzdylyǵy týraly aıtyp ótti.
— On jyl ishinde biz tálimgerlik jobasynyń turaqty, tıimdi jáne shyn máninde qajetti ekenine kóz jetkizdik. Bul jobany zań deńgeıinde nege bekitý qajet? Eń aldymen árbir taraptyń, barlyq múddeli taraptardyń jaýapkershiligi men quqyqtaryn bekitý úshin. «Tálimgerler» baǵdarlamasynyń tájirıbesi barlyq negizgi aspektilerdi eskerýge múmkindik berdi: kim tálimger bola alady, onyń quqyqtary men mindetteri qandaı, tálimgerler mektebi qalaı jumys isteıdi, sertıfıkattaý máseleleri jáne barlyq taraptardyń, sonyń ishinde memlekettik organdardyń jaýapkershiligi. Baǵdarlamanyń kópjyldyq tájirıbesi zańnamalyq túrde qandaı normalardy bekitý mańyzdy ekenin kórsetti, — dedi Ashat Aımaǵambetov.
Forým barysynda tálimgerler men olardyń tálim alýshylary sóz sóıledi. Olar ózara dostyqtary jaıly aıtyp, balanyń senimine qalaı ıe bolǵandaryn, onyń boıyndaǵy qabiletterdi qalaı ashqandaryn jáne ózine degen senimdilikti qalyptastyrýǵa qalaı kómekteskenderin bólisti. Sondaı-aq tálim alýshylar eresek ómirdegi naqty jetistikteri týraly áńgimelep, tálimgerliktiń ómirlerindegi mańyzyn atap ótti.
— Tálimgerler» baǵdarlamasy — aıqyn ádisteme men kásibı komanda. Biz kóp jetistikke jettik, biraq toqtap qalmaımyz, óıtkeni árbir oǵan muqtaj jasóspirimniń óz tálimgeri bolýy kerek ekenine senimdimiz, — dedi «Dara» qaıyrymdylyq qorynyń negizin qalaýshy Gúlnar Dosaeva.
Budan buryn habarlanǵandaı, Qazaqstanda jetim balalarǵa arnalǵan tálimgerler úshin mindetti sertıfıkattaý engizildi.