Tálimbaqty ýtılalym qarajaty esebinen salý máselesi pysyqtalyp jatyr — Nysanbaev

ASTANA. KAZINFORM — Elimizdiń óńirlerinde tálimbaqtardy ýtılalym qarajaty esebinen salý máselesi pysyqtalyp jatyr. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev aıtty.

«Abaı oblysynda iri orman órtiniń saldaryn joıý boıynsha qabyldanyp jatqan sharalarǵa toqtalyp ótsem. Qazirgi tańda órteńderdi ıgerýdi rezervattyń 33 jáne basqa orman paıdalanýshylardyń 5 brıgadasy júrgizip jatyr. Olardyń birinde harvester tıpti ónimdiligi joǵary eki keshen bar. Osy jyly lızıng esebinen rezervatqa 5 harvester jáne 7 aǵash tasıtyn mashına satyp alý josparlanyp otyr. Jumystar bastalǵaly beri 39,7 myń tekshe metr súrek daıyndaldy», — dedi mınıstr.

Onyń aıtýynsha, órtengen aýmaqtardaǵy ormandardy qalpyna keltirý jáne orman daqyldarynyń jersiný deńgeıin arttyrý maqsatynda «Semeı ormany» rezervatynda jabyq tamyrmen ósiretin tálimbaqty keńeıtý kózdelip otyr.

«Orman alańyn arttyrý elimizdiń ekologııalyq jaǵdaıyna qolaıly yqpal etetinin eskere otyryp basqa óńirlerde de osyǵan uqsas tálimbaqtardy ýtılalym qarajaty esebinen salý pysyqtalyp jatyr», — dedi Erlan Nysanbaev.