Tallınde TMD temirjolshylarynyń bas qosýynda jeltoqsandaǵy temir jol kestesi kelisildi
«Qazaqstan temir joly» kompanııasynyń baspasóz qyzmetiniń habarlaýynsha, Tallınge Ázerbaıjan, Armenııa, Belarýs, Qyrǵyzstan, Moldova, Reseı, Tájikstan, Túrkimenstan, Ózbekstan, Ýkraına temir jol ákimshilikteriniń basshylary men keńestiń qaýymdastyq músheleri - Bolgarııa, Grýzııa, Latvııa, Fınlıandııa temir jol ákimshilikteriniń jetekshileri de qatysty.
Otyrysta keńestiń 64-otyrysy sheshimderiniń oryndalý qorytyndysy men temir joldardy paıdalanýdyń 2016 jylǵy toǵyz aı qorytyndysy qaraldy.
Onyń ishinde, poıyzdardyń qozǵalys kestesin jasaý qorytyndysy, júk poıyzdaryn jáne halyqaralyq baǵdardaǵy konteınerlik vagondaryn jasaqtaý jospary, júk vagondary tizimin jasaý, konteınerlik vagondardyń mamyr qyrkúıek aılaryndaǵy tizimderin jasaýdyń aldyn - ala qorytyndysyn shyǵarý jumystary talqylandy.
Sonymen qatar 2016 jylǵy toǵyz aıdaǵy temir jol ákimshilikteri arasyndaǵy ózara esep aıyrysý týraly aqparat almasty. Barlyǵy temir jol kóligin toqtaýsyz júrgizý, Dostastyqqa qatysýshy elder arasyndaǵy temir joldarmen jolaýshy jáne júk poıyzdarynyń kedergisiz qozǵalysyn qamtamasyz etýge qatysty ondaǵan máseleler qaralyp, kelisildi.
Otyrysta TMD elderi temir jol jelilerindegi bıylǵy toǵyz aıda júk tıeý jospary artyǵymen oryndaldy. Jalpy kólemi 1 mlrd tonnaǵa jetkizildi.
Bıylǵy jylǵy toǵyz aıda ótken jylmen salystyrǵandaǵy júkterdi konteınerlik tasymaldaý jospary 1,7 mıllıon tonnaǵa artyǵymen oryndaldy. Aǵymdaǵy jylǵy toǵyz aıda ótken jyldyń sáıkes merzimimen salystyrǵanda, memleket aralyq túıisý núktelerindegi qabyldanbaǵan júk vagondarynyń jalpy kólemi 21 % azaıdy.
Otyrysta 2016\2017 jylǵy halyqaralyq vagon aǵymdaryn retteý ýaqyty 2016 jylǵy 11 jeltoqsandaǵy poıyzdardyń júrý kestesimen kelisildi.
Tallınde «QTJ» UK» AQ prezıdenti Q. Alpysbaev «Reseı temir joldary» AAQ prezıdenti O. Belozerovpen, Belarýs temir jolynyń bastyǵy V. Morozovpen kóliktik logıstıkalyq sharalardy birlesip uıymdastyrý jaıyn aqyldasty.
Qazirgi kóliktik logıstıkalyq jumystardyń aǵymdaǵy kórsetkishteri saralandy. 2017 jylǵy temir jol ákimshilikteriniń bazalyq konteınerlik qyzmet kórsetý, qozǵalys jyldamdyǵyn ósirýdegi tarıf saıasaty talqylandy.
Sonymen qatar Q. Alpysbaev Ózbekstan, Tájikstan, Túrkmenstan, Lıtva elderi arasyndaǵy júk tasymaldaýdy ósirý maqsatyndaǵy qolaıly jaǵdaı jasaý jónindegi ózara kezdesýleri ótkizildi.
Dostastyqqa qatysýshy elderdiń temir jol ákimshilikteri keńesiniń 66- otyrysyn 2017 jylǵy mamyrda Reseıde ótkizý josparlanyp otyr.
Eske sala ketsek, Temir jol kóligi keńesi 1992 jyly aqpanda Dostastyqqa qatysýshy memleketterdiń Úkimet basshylarynyń temir jol kóligi qyzmetin memleketaralyq deńgeıde úılestirý men kelisilgen tártippen júrgizý maqsatynda qurylǵan.
