Tallın meri Mıhaıl Kylvart týǵan jeri - Qyzylordamen áriptestik baılanys ornatpaq

QYZYLORDA. QazAqparat - Nur-Sultan qalasynda Qyzylorda oblysynyń ákimi Qyrymbek Kósherbaev pen Estonııa astanasy - Tallın qalasynyń meri Mıhaıl Kylvart kezdesti. Sheteldik qonaq týǵan jeri - Qyzylorda oblysymen áriptestik baılanys ornatpaq, dep habarlaıdy QazAqparat tilshisi.

Taraptar kezdesý barysynda Tallın qalasy men Qyzylorda oblysy arasynda yntymaqtastyq ornatý joldaryn talqylady.

«Búginde Estonııa Respýblıkasy - aqparattyq tehnologııalardy damytý boıynsha kóshbasshy memleket . Týrızm jáne kásipkerlik salalary da keńinen damýda, osyǵan baılanysty sizderdiń tájirıbelerińiz bizdi qyzyqtyrady», - dep atap ótti oblys ákimi Qyrymbek Kósherbaev.

Aımaq basshysy estonııalyq áriptesine óńirdiń áleýmettik-ekonomıkalyq damýy týraly aıtyp, Mıhaıl Kylvartty Qyzylorda oblysyna saparmen kelýge shaqyrdy.

Óz kezeginde Mıhaıl Kylvart oblys ákimine alǵysyn bildirip, yntymaqtastyqqa daıyn ekenin atap ótti.

«Biz Sizdi jáne qyzylordalyq delegatsııany Tallınde kórýge nıettimiz. Bul kezdesý birlesken tıimdi kópjaqty áriptestiktiń bastaýy bolady dep oılaımyn», - dedi Mıhaıl Kylvart.

Esterińizge sala ketelik, Mıhaıl Kylvart sáýir aıynda Tallın qalasynyń meri boldy. Ol 1977 jyldyń 24 qarashasynda Qyzylorda qalasynda dúnıege kelgen. Ómirbaıan derekterine súıensek, ol úsh jasynan bastap Tallın qalasynda ómir súrip keledi. 1999 jyldan bastap saıası salada túrli qyzmet atqaryp keledi. 2016 jyldan beri Tallın qalasynyń sport, mádenıet, ıntegratsııa jáne bilim jónindegi vıtse-meri qyzmetin atqarǵan.

Qyzmetine kelgennen keıin Mıhaıl Kylvart ózine tilektestik tanytqan Qyzylorda jurtshylyǵyna rızashylyǵyn bildirgen edi.