Qazaqstan bilim júıesinde ilgeriledi: Halyqaralyq baǵalaý nátıjeleri jarııalandy

ASTANA. KAZINFORM — Ekonomıkalyq yntymaqtastyq jáne damý uıymy júrgizgen TALIS-2024 sabaq berý jáne oqytýdyń halyqaralyq zertteýiniń nátıjesi boıynsha, Qazaqstannyń bilim berý júıesinde oń ózgerister baıqaldy.

Úkimettiń baspasóz qyzmetiniń habarlaýynsha, bul Prezıdent Qasym-Jomart Toqaev bastamashy bolǵan bilim berý salasyn damytý jáne pedagog mártebesin arttyrý sharalarynyń tıimdi júzege asyrylyp jatqanyn kórsetedi. 

TALIS zertteýi bilim berý ortasyn, pedagogterdiń eńbek jaǵdaılaryn, kásibı damý múmkindikterin, oqytý tájirıbesin jáne kásibı ustanymdaryn baǵalaıdy.

Zertteýge Qazaqstannan 7 myńnan astam pedagog jáne 369 mektep dırektory qatysty. Oqý-aǵartý mınıstrligi bul muǵalimderdiń oqý ortasyn jáne eńbek jaǵdaılaryn jaqsartýǵa baǵyttalǵan keń aýqymdaǵy jalǵyz halyqaralyq zertteý ekenin atap ótti.

— 2018 jylmen salystyrǵanda qazaqstandyq pedagogterdi ákimshilik jumystarǵa tartý azaıyp, olar sabaq berýge jáne ata-analarmen, qamqorshylarmen baılanysqa kóbirek ýaqyt bóle bastaǵan. Sondaı-aq mamandyǵyna jáne eńbek jaǵdaıyna qanaǵattaný deńgeıi edáýir artqan. Odan bólek, zertteý nátıjeleri pedagogterdiń eńbek jaǵdaıynda aıtarlyqtaı oń ózgerister bolǵanyn kórsetedi. Ótken oqý jylynda qazaqstandyq pedagogterdiń ortasha aptalyq júktemesi 36 saǵatty qurady. Al 2018 jyly bul kórsetkish 50 saǵat bolǵan. Mundaı qysqartý — EYDU elderiniń ishinde erekshe jaǵdaı. Sonymen qatar Qazaqstandaǵy pedagogterdiń ortasha jasy 41 jasqa deıin tómendedi, bul EYDU-degi ortasha kórsetkishten 4 jasqa tómen. Mańyzdy nátıjelerdiń taǵy biri — pedagogterdiń eńbek jaǵdaılaryna jáne jalaqysyna qanaǵattanýshylyq deńgeıiniń kóterilýi, — delingen habarlamada.

Saýalnama derekteri boıynsha, pedagogterdiń 95%-y óz jumysyna kóńili tolatynyn, al 80%-y mamandyqty qaıta tańdasa, qaıtadan muǵalim bolýdy qalaıtynyn aıtqan. 

Buǵan deıin bilim berý mekemelerinde býllıngke qarsy ınnovatsııalyq júıe engiziletini anyqtaldy.