Tálipterden qashqan bir top aýǵanstandyq Tájikstan shekarasynan ótip ketti

DÝShANBE. HOVAR-QazAqparat – Keshe Aýǵanstannyń Badahshan provıntsııasyna qarasty Andemın qystaǵynyń 77 turǵyny (sonyń arasynda 26 er adam, 20 áıel jáne 31 bala) tálibter tarapynan tónip turǵan qaýip sebebimen Tájikstan Respýblıkasynyń aýmaǵyna ótti. Bul týraly QazAqparat Tájikstannyń Hovar aqparat agenttigine silteme jasap habarlaıdy.

Tájikstan Respýblıkasy shekarashylary izgilik pen tatý kórshilik prıntsıpterin basshylyqqa ala otyryp, aýǵan bosqyndaryna/Tájikstan Respýblıkasynyń aýmaǵyna ótýine ruqsat berdi.

Qazirgi kezde bosqyndar TR Mýrgab aýdanyndaǵy Kızıl-Rabot aýyldyq djamoatynyń Andemın jáne Cheshteba ýchaskeleri aýmaǵyna ornalastyryldy. Bosqyndar ózderimen birge malyn (1000 bas qoı-eshki, 300 qodas, 3 túıe jáne 30 jylqy) aıdap ákelgen.

«Atalǵan shekara ýchaskelerindegi jaǵdaı Tájikstan Respýblıkasy shekarashylarynyń baqylaýynda», - delingen Tájikstan Respýblıkasy MUQK Shekara qyzmetiniń baspasóz ortalyǵy taratqan málimdemede.

Eske salsaq, Aýǵanstandaǵy jaǵdaı kúrdelenip Aýǵanstannyń qarýly áskerıleri Ózbekstan men Tájikstan aýmaǵyna ótip ketken edi. «Talıban» qozǵalysy Aýǵanstandaǵy kóptegen jerlerdi basyp aldy.

Sondaı-aq, Tájikstan Aýǵanstanmen shekarany nyǵaıtý úshin 20 myń sarbazdy áskerge shaqyrmaq.