Tálipter áıelderdiń ulttyq saıabaqqa barýyna tyıym saldy

KABÝL. QazAqparat – Talıban úkimeti áıelderge Bamıan provıntsııasyndaǵy Band-e-Amır ulttyq saıabaǵyna barýǵa tyıym saldy, dep habarlaıdy QazAqparat BBC News-ke silteme jasap.

Aýǵanstannyń Ar-uıat mınıstriniń mindetin atqarýshy Mohammad Haled Hanafı áıelder saıabaqta hıdjap taqpaǵanyn aıtyp, din qyzmetkerleri men qaýipsizdik organdaryna bul máseleniń sheshimi tabylǵansha olardy saıabaqqa kirgizýge shekteý qoıýǵa shaqyrdy.

Band-e-Amır mańyzdy týrıstik oryn. Ol – 2009 jyly qurylǵan Aýǵanstandaǵy alǵashqy ulttyq saıabaq. Park turǵyndar arasynda otbasymen ýaqyt ótkizetin tanymal oryn bolatyn.

Aýǵanstannyń burynǵy parlament depýtaty Marıam Sýleımanhıl shekteýge qatysty óleń shyǵaryp, buryn Twitter ataýymen tanymal bolǵan H áleýmettik jelisinde «Biz oralamyz, oǵan senemin» dep jazdy.

Human Rights Watch ókili Fereshta Abbası áıelderge Áıel teńdigi kúninde saıabaqqa barýǵa tyıym salǵanyn atap ótip, «bul – Aýǵanstan áıelderine kórsetilgen qurmetsizdik» dep jazdy.

Talıbannyń áıelderge keı qyzmet túrlerimen aınalysýǵa ýaqytsha tyıym salýda tájirıbesi bar. 2022 jyldyń jeltoqsanynda olarǵa mektepke barýǵa shekteý qoıyldy.

Band-E-Amır ulttyq saıabaǵyna barýǵa salynǵan tyıym Talıban 2021 jyldyń tamyzynda bılikke qaıta kelgennen keıin áıelderge aınalysýǵa bolmaıtyn qyzmet túrleriniń uzyn tiziminde sońǵy bolyp tur.

Jaqynda tálipter Aýǵanstandaǵy shashtarazdar men sulýlyq salondaryn jabýdy buıyrdy, al shildeniń ortasynda áıelderge ulttyq ýnıversıtetterge túsý úshin emtıhan tapsyrýǵa tyıym saldy.