Tálipter Aýǵanstan aýmaǵynda aspanǵa oq atýǵa tyıym saldy

NUR-SULTAN. QazAqparat – «Talıban» radıkaldy qozǵalysy jergilikti ákimshilikter men áskerı qyzmetkerlerge búkil Aýǵanstan aýmaǵynda áýege oq atýǵa tyıym salýǵa nusqaý berdi. Jeksenbide tıisti ókimniń mátinin qozǵalys ókili Zabıhýlla Mýdjahıd Twitter-de jarııalady, dep habarlaıdy QazAqparat.

«Aýǵanstan Islam ámirliginiń» (tálipterdiń ózin-ózi ataýy) áskerı ister jónindegi komıssııasy qol qoıǵan nusqaýlyqta «Kabýlda jáne eldiń basqa da qalalarynda áýege oq jaýdyrý adamdardyń ólimine jáne jaraqattanýyna, sondaı-aq beıbit turǵyndar arasynda úreı týdyratyny» aıtylǵan.

«Osyǵan baılanysty Kabýl men provıntsııalardaǵy barlyq áskerı sheneýnikter, komandırler jáne basqa da jaýapty adamdarǵa aspanǵa oq atqandardy dereý tutqyndap, qarýsyzdandyrý tapsyryldy. Kabýl men provıntsııanyń polıtsııa basshylaryna, sondaı-aq barlaý qyzmetkerlerine quqyq buzýshylardy anyqtaý jáne jazalaý úshin jedel jáne qatań sharalar qabyldaýǵa nusqaý berildi», - delingen tálipterdiń nusqaýynda.

Buǵan deıin habarlanǵandaı, senbi kúni Pandjsher provıntsııasyn basyp alý týraly habarlamalardan keıin «Talıban» radıkaldy qozǵalysynyń sodyrlary jappaı beı-bereket oq jaýdyrǵan. Atys saldarynan elde qaza tapqandar men jaralanǵandar sany 70-ten asty.