Tálimgerler: Qaraǵandy balalar úıiniń jasóspirimderi týraly kitap jaryqqa shyqty
QARAǴANDY. QazAqparat – Dostyqty sandarmen ólsheýge bola ma? Nelikten ár balaǵa eresek dos kerek? Osy jáne basqa da kóptegen suraqtarǵa «Tálimgerler: balalar úıiniń balalarymen dostyqtyń tarıhy» kitaby jaýap beredi, dep habarlaıdy QazAqparat tilshisi.
Jaqynda osy kitaptyń úshinshi bóligi satylymǵa shyqty. Onda Qaraǵandy balalar úıiniń tálimgerleri men qamqorshylarynyń ózara qarym-qatynasy týraly áńgimeler jınaqtalǵan.
Alǵashqy eki bólim Almaty men Nur-Sultan qalalarynan kelgen «Tálimgerler» jobasynyń qatysýshylaryna arnalǵan.
Bul kitap nelikten paıda bolǵany jáne kimge qyzyqty bolatyny jaıly joba jetekshisi Aınur Armýrzına aıtyp berdi.
«Bul kitaptyń ne týraly ekenin túsiný úshin «Tálimgerler» jobasy týraly bilý kerek. Ony 2014 jyly «Dara» qaıyrymdylyq qory basqa kommertsııalyq emes uıymdarmen seriktestikte iske qosqan. Qordyń ózi óz jobalaryn 14 jyldan astam ýaqyttan beri júzege asyryp keledi. Bizdiń negizgi baǵytymyz – erekshelikteri bar balalarǵa jáne balalar úıiniń balalaryna damý úshin múmkindik berý, olarǵa bilim alýǵa jáne qoǵamda áleýmettenýge múmkindik berý», – dep sanaıdy Aınur Armýrzına.
«Tálimgerler» jobasynyń maqsaty – eresek dosy arqyly balalar úıindegi jasóspirimge qoǵamǵa beıimdelýge kómektesý.
Búginde búkil Qazaqstan boıynsha ata-anasynyń qamqorlyǵynsyz qalǵan 4 myńnan astam bala bar.
Bul negizinen 10 jastan asqan balalar. Qıyndyqtardan qoryqqan qazaqstandyqtar jasóspirimderdi sırek asyrap alady. Sonymen qatar, olardyń kópshiligin asyrap alý múmkin emes.
Olardyń ata-anasy ata-ana quqyqtarynan aıyrylmaýy, bas bostandyǵynan aıyrý oryndarynda bolýy, habar-osharsyz ketken dep eseptelýi múmkin.
Sonymen qatar, zań boıynsha baýyrlar men ápkelerdi bólýge bolmaıdy.
«Tálimgerler» jobasy osyndaı jasóspirimderge eresek dos usynýǵa arnalǵan. Ony áleýmettendirip, balalar úıinen shyqqannan keıin táýelsiz ómirge daıyndaý kózdelgen. Sebebi kóbinese balalarda qarapaıym turmystyq jáne qarym-qatynas daǵdylary bolmaıdy. Biz barlyq balalardyń qoǵamymyzdyń tolyqqandy azamaty bolýǵa teń múmkindikteriniń bolǵanyn qalaımyz», – deıdi joba jetekshisi.
Qaraǵandyda «Tálimgerler» 2015 jyly iske qosyldy. Jobaǵa tórt balalar úıi – «Ásem», «Tańsholpan», «Qulynshaq» jáne Temirtaý qalasyndaǵy SOS balalar aýylynyń balalary qatysady.
«Kitapta biz senýge, dostasýǵa jáne eń jaqsysyna senýge úırengen joba qatysýshylarynyń jeke tájirıbelerin jınadyq. Psıhologtardyń jasóspirimderdiń ata-analaryna arnalǵan paıdaly usynystary, tájirıbeli úılestirýshilerdiń pikirleri bar. Jalpy, osyndaı oqıǵalardyń arqasynda biz bári beker emes ekenin túsinemiz. Jyldam nátıje bolmaıdy, biraq jaqsy jaqqa ózgeris bar. Mysaly, joba jumys istegen ýaqytta 20 balanyń tálimgerleri asyrap alýshy ata-ana bola aldy», – deıdi Aınur Armýrzına.
Kitap qalyń oqyrman qaýymǵa qyzyqty bolady.
Ol ózin damytý týraly oılaıtyn, qaıyrymdylyq pen eriktilikpen tanys, balalarǵa kómekteskisi keletin jáne daıyn adamdarǵa arnalǵan.
Basylymdy elektrondy túrde úsh tásilmen satyp alýǵa bolady: «Dara» qorynyń saıty men «LıtRES» saıtynda, sondaı-aq qordyń Instagram-paraqshasyndaǵy chat-botta.
«Bolashaqta biz kitapty baspa túrinde shekteýli mólsherde basyp shyǵarýdy josparlap otyrmyz. Qazir barlyq túsken qarajat balalar úıleri men jasóspirimder úıleriniń jasóspirimderine arnalǵan bilim kýrstaryna, repetıtorlarǵa aqy tóleýge jumsalady. Bul - UBT-ǵa daıyndyq, shet tilderin úırený. Jasyratyny joq, balalar joǵary oqý oryndaryna sırek túsedi. Negizinen olar kolledjderge baǵyt boıynsha barady, al bul árdaıym suranysqa ıe mamandyqtar emes. Olarda tańdaý múmkindigi shekteýli bolady. Qazirgi ýaqytta repetıtorlar Almaty balalar úıiniń tárbıelenýshilerimen aınalysady. Eger jetkilikti qarajat jınalsa, qor «Tálimgerler» jobasy iske qosylǵan barlyq 13 qalada kýrstar ashýdy josparlap otyr», – dedi Aınur Armýrzına.
