Tálibter beıbit aýǵandyqtardy óltirgenderi úshin AQSh-tan kek alýǵa ýáde berdi
ASTANA. 13 naýryz. QazAqparat - «Talıban» ekstremıstik toby 11 naýryz kúni amerıkandyq áskerılerdiń qolynan qaza tapqan 16 beıbit aýǵandyqtyń kegin almaq.
Sky News agenttigine silteme jasap Lenta.ru-diń habarlaýynsha, bundaı málimdeme tálibterdiń saıtynda ornalastyrylǵan.
Tálibterdiń málimdemesi amerıkandyq taraptyń Aýǵanstannan birneshe márte keshirim suraǵannan keıin ile-shala jarııalanyp otyr. Onda olar qaza tapqandardyń basym bóligi áıelder, balalar jáne qarttardyń bolǵandyǵyna nazar aýdaryp, amerıkandyq áskerılerdi «basqynshylar», «taǵylar» dep sıpattaǵan.
Aıta keterligi, AQSh Prezıdenti Barak Obama aýǵandyq áriptesi Hamıd Karzaımen telefon arqyly sóılesýi barysynda oqıǵaǵa tolyqqandy tergeý amaldary júrgizilip, barlyq kinálilerdiń jazalanatyndyǵyna ýáde etti. Dál osyndaı ýádeni AQSh Qorǵanys mınıstri Leon Panetta, Aýǵanstandaǵy halyqaralyq kúshterdiń qolbasshysy, general Djon Allen de berdi.
Beıbit turǵyndarǵa jasalǵan shabýyl 11 naýryz kúni túnde Kandagar provıntsııasynda oryn aldy. 16 adam da óz úılerinde óltirilgen. Associated Press agenttiginiń aqparatyna sáıkes, aýǵandyqtarǵa oq atqan jaýyngerdiń serjant ekendigi belgili. Onyń aty-jóni ázirshe jarııalanbaı otyr. Bundaı qylmysqa onyń ne sebepti barǵandyǵy da belgisiz.
